DÍLI, STLTIMORLESTE.com – Tribunál Judisiál Primeira Instánsia Dili (TJPID) iha loron Sesta (13/11/2026) hala’o prosesu sumáriu ba funsionáriu Estadu na’in rua, tanba uza kareta Estadu lori labarik ba eskola, iha Dili.
Arguidu na’in rua ne’e ho inisiál RdA no VdCB, hanesan funsionáriu husi Instituisaun rua.
Kazu ne’e relasiona ho krime pekulatu de uzu, tanba arguidu sira uza veíkulu Estadu ba interese privadu, hodi lori sira-nia oan ba eskola.
Tuir informasaun ne’ebé hetan, arguidu ida uza kareta husi Instituisaun Ministériu Interiór atu lori nia oan ba eskola, enkuantu arguidu seluk uza kareta Parlamentu Nasionál lori nia oan ba eskola.
Komisaun Anti-Korrupsaun (KAK) mak aprezenta kazu ne’e ba Ministériu Públiku, depois detein arguidu na’in rua durante oras 72, antes lori sira ba prosesu sumáriu iha tribunál.
Iha alegasaun defeza, Defensór Públiku Marçal Mascarenhas husu tribunál atu aplika pena Admoestasaun ba arguidu na’in rua.
Defeza mós husu atu fó hanoin ba arguidu sira atu la repete utilizasaun veíkulu Estadu ba atividade privadu.
Enkuantu Ministériu Públiku, reprezenta husi Prokuradór Domingos Goveia Leite, husu tribunál atu aplika pena suspensaun ba arguidu na’in rua.
Depois rona alegasaun husi parte rua, tribunál liuhusi juis José Maria adia leitura desizaun ba loron 17 Novembru, tuku 14:00.
(ter)
