DILI, STLTIMORLESTE.com – Lei reforma IX Governu Konstitusional aprova iha Konselhu Ministru (KM) nee sei dignifika vereranu sira neebe sei ativu iha instituisaun FALINTIL – Forsa Defeza Timor Leste (F-FDTL), bainhira pasa ba idade reforma.
Liafuan nee hatete husi Ministru Defeza, Kontra Almirante Donaciano Costa Gomes Pedro Klamar Fuik ba jornalista sira iha MinisteriuFinansas, Aitarak Laran, Segunda (11/08/2025).
“Lei ida diak liu nee mak IX Governu Konstitusional aprova nee. Lei nee dignifika veteranu sira nee mak ita halo nee, ida nee laos publiku mak determina, maibe ida nee tenke tuir Governu no tuir Estadu mak determina, no inklui konforme lei mak hela iha leten ba buat hotu-hotu, ba estadu no ba nasaun no ba ema hotu-hotu,” nia tenik.
Nia afirma, molok aprezenta dekretu lei nee ba Konselhu Ministru, hanesan Ministru Defeza lori ona dekretu lei nee ba Konselhu Superiór Defeza no Militár.
“Konsultasaun nee iha mekanizmu Konselhu Superior Defeza Militar, se deit mak koalia iha media dehan la iha konsultasaun nee, la konhese irarkia militár, signifika seidauk transforma nian aan. Kuandu nia hatene reforma signifika mak ida nee, modernizasaun no profisionalizasaun,” nia esplika.
Nia informa, lei reforma neebe Ministeriu Defeza aprezenta ona ba Konselhu Ministru publika ona Jornal Republika entra vigor nee hahu 31 Dezembru 2025, nunee sei fo reforma ba veranus sira neebe sei ativu iha F-FDTL.
Nia deklara, agora Ministru Defeza seidauk simu lista iha ema nain hira mak atu reforma. Tanba Governu seidauk promunsia buat ruma.
“Xefe Estadu Maior Jenerál mak sei aprezenta lista ba reforma nian, neebe Xefe Estadu Maior Jenerál seidauk aprezenta, entaun Ministru seidauk bele komenta buat ida,” nia koalia.
Governante nee informa, reforma nee lei, kuandu idade tama tinan 60 iha obrigasaun reforma.
“Reforma nee direitu no direitu ida nee mak define iha lei nee. Hanesan ita boot nia profisaun agora jornalista, kuandu ita boot too tinan ida iklu moris mak too idade 60 ona, no haree ba valores hotu neebe mak iha ita ema dehan tenke ba uma deskansa, entaun tenke ba uma deskansa,” katak nia.
Iha fatin hanesan, Veteranus Costantino Ximenes “Nehek Metan” koalia, fo sai iha jornal Republika katak, lei reforma neebe IX Konstitusional aprova sei trata veteranu ativu F-FDTL ho dignu.
(jen)
