DILI, STLTIMORLESTE.com – Sekretariu Jeral Partidu FRETILIN, Mari Alkatiri prontu atu debate ho Prezidente Republika (PR) Jose Ramos Horta, kona-ba Prezidente nia intervensaun ba Nomeasaun Prezidente Tribunal Rekursu Afonso Carmona, inklui mos lei sira iha tribunal.
Eis Primeiru Ministru atual Sekretariu Jeral Partidu FRETILIN, Mari Alkatiri ba jornalista sira iha salaun Podcast Farol, Tersa nee (19/08/2025) hatete, nia prontu atu halo debate ho Prezidente Republika Jose Ramos Horta kona-ba lei sira.
Eis Primeiru Ministru dehan, desizaun husi Tribunal sempre hetan intervensaun husi Prezidente Republika Jose Ramos Horta, neineik Tribunal sei la funsiona, entaun se mak bele deside ou foti fali desizaun.
Mari hatutan, agora tama fali konflitu instituisaun la kleur tan tribunal la funsiona, entaun ida nee se mak atu deside, intervensaun sempre mai husi Prezidente Republika Jose Ramos Horta atu kontrola fali tribunal.
Sekretariu Jeral Partidu FRETILIN konsidera Prezidente Republika la hatene interpreta lei sira, karik Prezidente hatene bele halo debate ho Sekretariu Jeral maibe debate publiku.
“Lei deit mos nia la hatene interpreta, la hatene hau hatete momos, efisiensia direitu atu koalia deit mos PR Horta la hatene saida, hau prontu atu debate ho nia. Hau prontu atu debate pontus sira be nia foti hotu nee hau prontu atu debate ho nia, maibe debate publiku,” katak Sekretariu Jeral Partidu FRETILIN nee.
Alkatiri dehan, nia lakohi sobu Prezidente Republika no Governu maibe ida neebe sobu Justisa Timor Leste ida nee mak nia lakohi.
(eme)
