DILI, STLTIMORLESTE.com – Fundador RDTL no Eis Primeiru Ministru atual Sekretariu Jeral Partidu FRETILIN, Mari Alkatiri hatete, IX Governu Konstitusional la tau ninia fotografia iha baner komemorasaun loron FALINTIL ba dala 50, tanba tauk.
Dehan Sekretariu Jeral Partidu FRETILIN, Mari Alkatiri ba jornalista sira, iha Farol, Dili, Tersa (19/08/2025).
“Ema la tau hau nia fotografia tanba tauk hau, hau nia fotografia deit mos sira tauk ona, satan hau besik tan nee halo nusa, hau la preokupa, hau preokupa ho futuru rai ida nee, tau hau ka la tau hau nee hau la preokupa, tanba hau nafatin hau la muda,” katak Sekretariu Jeral Partidu FRETILIN, Mari.
Fundador RDTL nee hatete, hanesan mos ema mate ho oin tolu, ida mak nia vida rasik hanesan ema moris, ida mak nia vida profisional no ida mak nia vida politika.
Ida agora tebe aan tun sae nee tanba vida politika atu too ona rohan la hatene hanoin katak tenke hatene ba oin futuru saida mak akontese ba rai ida nee no sa legadu mak atu husik ba jerasaun foun aban bainrua.
“Komesa justifika ida nee mos halo sala entaun dehan hau mos iha direitu halo sala, hau lakohi dehan ema seluk halo sala, agora dehan fali setimu Governu nee inkonstitusional entaun semak asina tratadu ba Timor nee se laos setimu Governu, bobar tiha tratadu ba Timor, tratadu Fronteira, Aniceto Guterres Prezidente Parlamentu inkonstitusional, hai entau semak fo pose ba ita boot entaun ita boot ilegal, too agora hau sira buat rua deit la presiza sita buat seluk,” katak Mari.
Sekretariu Jeral Partidu FRETILIN, Mari dehan, se ema mak hatene direitu, entaun direitu nee subtansia iha prosesu, no prosesu nee inklui time se husik tinan 20 mak komesa foti fali problema ida nee laiha ona.
“O tenke hatene adapta o nia aan ba realidade atual o hatudu katak o mak diak liu, laos o mai buka rekonhese tiha o nia sala depois dehan sira seluk mos sala hotu, nee hanesan tebe ain hanesan vida politika,” katak Mari.
(eme)
