DILI, STLTIMORLESTE.com – Prezidente Republika (PR), Jose Ramos Horta husu Timoroan hakruuk ba FALINTIL neebe mate ona no hakruuk ba sira neebe sei moris, tanba sira nia luta lori rai nee ba hetan ukun rasik aan.
Prezidente Republika Jose Ramos Horta hatoo kestaun nee liu husi mensajen 20 Agostu iha Palasiu Prezidensial Nikolao Lobato, Bairo Pite, Kuarta (20/08/2025).
Nia hatete, iha loron importante nee hanoin mos joven no ferik katuas, kombatente naun kombatente neebe mate iha rai laran.
“Loron sira nee ita hanoin mos Timoroan mane, feto, joven, ferik, katuas, kombatente naun kombatente neebe mate iha rai laran, hau mos hanoin beibeik ba sakrifisiu neebe ita nia povu halo no joventude halo lubuk ida lakon sira nia vida,” katak PR Horta.
Prezidente Republika dehan, iha tempu luta joven lubuk ida lakon vida, barak lakon estudu, no eroi barak mate iha Santa Kruz nomos fatin barak.
“Sira neebe mate iha Santa Kruz no fatin barak-barak too ohin seidauk hetan sira nia ruin. Hau la fiar ke sei bele hetan loron ruma, maibe hau mos admira tebes elementu sira neebe kombate luta tinan 24 nee mak hau admira liu, hau konhese luta barak iha mundu nee, tinan 24 iha liur hau la tuur, hau la toba iha neebe hau estuda klean movimentu oin-oin iha mundu, hau admira tebes ita nia luta nee, hau admira eroi sira hanesan Maun Boot Xanana ou Taur Matan Ruak ou Lere Anan Timur sira nee la hatene bainhira mak luta nee remata ho vitoria ou vitoria iha duni ka lae sira fiar vitoria iha,” katak Horta.
Prezidente Republika hatete, nia admira ho luta nee no admira ho luta nain sira hanesan Lider Karismatiku Kay Rala Xanana Gusmão, Eis Prezidente Republika Taur Matan Ruak, Jeneral Reformado Lere Anan Timur ho seluk tan neebe luta ho esperansa ikus hetan vitoria, Timor Leste hamriik nuudar nasaun Republika Demokratika Timor Leste.
Dala ruma hahan laiha, sira han buat hotu-hotu neebe sira bele tau iha sira nia ibun, tinan ba tinan dala ruma bee moos laiha sira hemu, bee foer mota laran ou bee kolam mais sira la rende. Veteranus sira nee merese duni orgulhu, maibe sira neebe veteranus ke la husu buat barak sira fo buat hotu ba povu fo buat hotu ba patria ba nasaun no la husu buat barak sira kontinua umilde nafatin simples.
Horta hatete, estadu ida nee lideransa sira hahu kedas iha independensia, liu-liu 2007 ho Governu AMP mak halo esforsu barak identifikasaun veteranus hotu-hotu rihun ba rihun fo rekonhesimentu ba sira, depois bainmhira osan tama husi Bayu Undang, fundu petrolifeiru Governu komesa tulun veteranus sira. No orsamentu perkapita boot kompara iha mundu nee halo fuan, laos veteranus mak ezije maibe estadu mak fo rekonhesimentu.
Iha loron importante nee Prezidente hakruuk ba veteranus sira no ba F-FDTL sira neebe veteranus luta tinan 24, hodi lori Timor Leste hetan ukun rasik aan.
(eme)
