BAUKAU, STLTIMORLESTE.com – Fundasaun Klinika Lafaek Diak daudaun nee implementa klinika movel iha suku 11, ho objetivu luta redus taxa mortalidade inan ho oan no moras seluk tan.
Diretor Poliklinika Fundasaun Lafaek Diak, Delfin da Silva Belo Morais informa, iha 2025 nee Fundasaun Klinika Lafaek Diak hetan apoiu fundu husi Gabinete Apoiu Sosiedade Sivil ho valor rihun US$ 30, ba objetivu atu responde ho efetivu ba servisu saude ba komunidade nian neebe implementa liu husi klinika movel iha suku 10 mak hanesan, suku Bahu, Tirlolo, Buruma, Tequinomata, Samalari, Uailili, Ostico, Gariwai, Ossoala, Vemasse inklui Suku Cairui.
“Ami nia planu kontratu nee bazeia ba suku 10 resin, hodi reduz taxa mortalidade inan isin rua no bebe nian neebe ita hatene moras aas liu ISPA no tuir mai mak moras Hypertensaun,” hateten Delfin da Silva Belo Morais ba jornalista sira hafoin remata konsulta saude ba komunidade sira iha Uaimanuboe, Sesta (22/08/2025).
Nia sublina, programa Klinika Movel mak pasu ida hakbesik liu tratamentu saude ba komunidade sira neebe hela dook husi Postu Sanitaria no Klinika, ho sentidu atu redus numeru mortalidade inan ho oan no redus moras seluk tan.
Liu husi Klinika Movel neebe iha fo konsulta gratuitu ba, liu liu inan isin rua, bebe no moras seluk neebe durante nee konsidera difisil asesu fasilidade saude.
“Inan isin rua ami rejistu mai kontrola mak barak, ami fo vitamina kontrola sira nia tensaun no monitor, karik sira nia tensaun aas refere sira ba Hospital,” nia katak.
Autoridade Lokal Uaimanuboe Bemvindo Xavier Gusmão agradese ba Fundasaun Klinika Lafaek Diak, tanba lori atendimentu saude besik ba komunidade sira iha Aldeia Uaimanuboe no Uatubala, neebe durante nee asesu ba fasilidade saude ho distansia dook tebes.
“Atendimentu Lafaek Diak iha Aldeia Uaimanuboe nee diak liu, tanba haree ba distansia husi Uaimanuboe ba Sentru Saude Uailili dook, tanba distansia kilometru 3 resin,” katak Bemvindo.
Xefe Aldeia Uaimanuboe nee argumentu, mezmu Ministeriu Saude inisia programa Sisca neebe hi objetivu atu lori besik atendimentu saude ba komunidade sira neebe hela dook husi fasilidade saude, maibe durante nee komunidade Aldeia Uaimanuboe la sente, tanba implementasaun Sisca la efetivu.
Enkuantu komunidade Aldeia Uatubala, Estefania Elesaria Freitas sente kontente, tanba bele hetan konsulta saude besik liu iha Aldeia Uaimanuboe.
Entertantu durante Fundasaun Klinika Lafaek Diak implementa klinika movel iha Aldeia Waimanuboe, Suku Uailili, Postu Administrativu Baukau Vila hetan partisipasaun masimu husi komunidade sira no akompanhamentu husi Xefe Aldeia Uaimanuboe no Uatubala.
(tom)
