AILEU, STLTIMORLESTE.com – Movimentu Reafirmasaun Reformasaun Nasional (MORENA) hahu monta ona ninia estrutura iha Munisipiu Aileu, hodi prepara aan ba rejistu hanesan partidu, nunee bele kompete iha eleisaun mai.
MORENA hanesan movimentu ida neebe iha nia manual ho programa politika neebe defini klaru katak, MORENA laiha adversariu iha mak aleadus ho objetivu ida deit diferente mak iha vizaun.
Ho nunee ohin MORENA deklara eziste iha Munisipiu Aileu, husi pontu neen neebe hatoo ona ba publiku iha deklarasaun nasional loron 20 fulan Junhu 2025..
“Loron ida ohin ami organiza ezistensia movimentu ninian iha Aileu, hanesan normalmente movimentu sira liu ba deklara ninia ezistensia nasional,”dehan Prezidente MORENA, Cesar Valenti “Pilotu La Monu” ba Jornalista sira, iha Munisipiu Aileu, Sabadu (23/9/2025).
Hafoin monta ka esabelese estrutura iha baze Eis Deputadu Bankada CNRT nee dehan, sira sei halao programa edukasaun politika katak, halo politika tenki koalia tuir koridor dezenvolvimentu no prograna neebe iha.
“Se ita husu partidu boot sira nia ema esplika programa saida automatika sira esplika arbiru deit, oinsa mak dezemvolvimentu ida nee lao tuir forma ida neebe iha,” hatete Eis Deputadu Bankada CNRT nee.
Tanba nee nia hakarak ba oin informasaun politika ba kudrus MORENA nian tenki komprende katak, ”vota ba partidu ida nia vota ba se no nia hatene katak, husi nia votu neebe nia fo, nia bele hetan benefisiu liu husi dezemvolvimentu sira,” katak Cesar.
Iha estrutura MORENA nia oin Cesar kompremete katak, MORENA sei nakloke aan ba ema hotu, tanba MORENA hari ba Timoroan hotu. No iha tempu besik MORENA sei deklara ninia ezistensia ba Minisipiu sira seluk.
“Iha tempu besik ita sei deklara iha Sub Rejiaun sira seluk, tanba MORENA nee hari ba Timoroan hotu, laos ba ema ida rua deit,” Cesar promete.
Eis Membru FALINTIL – Forsa Defeza Timor Leste nee mos ezije para konstrusaun estadu nee tenki garante ba povu iha kraik nia dignidade ba rejistensia nia obra no reforma administrasaun tanba, administrasaun publiku nakfila tiha ona hanesan kampu atividade ekonomika ba Funsionariu Publiku sira.
Iha fatin hanesan Porta Voz MORENA, Zelia Florinda Soares hatete, MORENA mosu atu fanun Timoroan tomak katak, ukun nain sira lori Timor-Leste nia ukun rasik aan lao kuaze tinan 24, maibe taka loke deit kolonial nia obra mos la hotu.
“Ita la lao sala dalan, karik ita nia sistema mak sala, se ita nia sistema mak sala mak ita presiza reforma ba dalan loos neebe ita hili ho lian lulik, mate ka moris ukun rasik aan,” dehan Florinda.
Entretantu MORENA deklara ninia ezistensia ba publiku iha loron 20 fulan Junhu tinan 2025 liu ba, maibe nia feitu ho nia emblema, bandeira, estatutu, manual no programa politika rasik. MORENA la sadere ba lider ida, lider sira ema hotu nian, tanba nee MORENA hakarak sai edukador politika ba povu.
(car)
