DILI, STLTIMORLESTE.com – Ministeriu Edukasaun (ME) liu husi unidade kurríkulu nasional elabora pontus ezame nasional remata ona, no daudaun nee iha faze revizaun.
Koordenador Gabinte Unidade Kurríkulu Nasional iha Ministeriu Edukasaun, João Maupelu dehan, preparasaun ba ezame nasional ninia, agora iha hela faze elaborasaun pontus ezame nasional ba ensinu baziku ho sekundariu jeral desimu segundu, tekvo desimu segundu.
“Ita sei kontinua elabora, depois halo revizaun final, depois ita sei kontinua ba iha empresaun pontus ezame nasional. Ita fazeadamente elaborasaun pontus ezame hotu ona, agora ita halo revizaun cuality control ba pontus nee besik finaliza ona. Ita lao tuir kalendariu neebe iha, inisiu de Setembru ita hahu ba imprimi, la sala iha loron 8 fulan Setembru nian laran,” dehan João ba jornalista iha edifisiu Ian Martin Balide, Kinta (28/08/2025).
Maupelu hatete, kona-ba lista finalista agora kordena ho munisipiu sira, maioria kuaze tama hotu ona. Lista provizoriu dadaun nee provolta rihun 54 estudantes finalista ba ensinu baziku no sekundariu. Lista nee sei iha mudansa, tanba eskola sira sei aktualiza mai.
“Tinan nee ita halo kordenasaun ho sentru impresaun ME nian iha kapasidade,tinan uluk ita la imprimi iha nee ba,tanba tinan uluk imprimi livru barak. Tinan nee livru dudatiku disiplina sira imprimi hotu ona,entaun tinan nee ita imprimi iha sentru impresaun ME nian,dia 8 hahu impresaun provolta quarenta dias, depois iha 17 de Outubru ita distribui, dia 20 Outubru ita realiza ezame nasional,” nia esplika.
Iha fatin seluk, Diretor Eskola Sekundariu Nobel da Paz, Jeremias P. de Jesus hatete, kona-ba sira nian lista finalista haruka tiha ona ba ME liu husi Servisu Edukasaun Munisipiu Dili nian, tanba ezame nasional nee rasik sei halao iha fulan Outubru tinan ida nee nian laran.
Jornalista: Jacinta Sequeira
Editor: Domingas Gomes
