DILI, STLTIMORLESTE.com – Ministeriu Edukasaun (ME) introdus ba kurrikulu nasional baze foun ba siklu datoluk husi ensinu baziku ba manorin sira klase da 7.
Ministra Edukasaun (ME), Dulce de Jesus Soares afirma, mezmu tempu iha 2026 sei kontinua halo revizaun oetavu ano, depois tinan tuir mai lansa fali, no tinan ida nee komesa prepara ona ba desimu segundu ano, atu nunee kurrikulu hee iha alineamentu husi setimu ano ba too desimu segundu ano, tanba primeiru siklu no segundu siklu halo tiha ona iha governasaun 2014 mai too 2017.
“Ohin loron marka tan historia importante ida, iha dezenvolvimentu edukasaun iha TL, tanba iha governu konstitusional ME liu husi unidade kurikulu nasional dezenvolve ou halo revizaun ba kurrikulu terseiru siklu, neebe maka kurrikulu nee iha ita nian rai tinan sanolu ona. Iha tinan ida nee ita halo revizaun kompleta livrus no gia dos professor mos iha, agora tama ba iha faze formasaun, atu nunee iha ano letivu foun ba terseiru siklu setimu ano ita uza ona kurrikulu foun,” dehan ME Dulce ba jornalista iha salaun Ian Martin Balide, Kinta (28/08/2025).
Nia dehan, kuaze atu kompleta ona kurrikulu iha TL, maibe kurrikulu deit la too governu kontinua hari insfraestrutura eskola, halo rekrutamentu ba professores ba nibel ensinu hotu, iha livrus sidatikus, iha gia dos professores, iha diferensia ida entre kurrikulu terseiru siklu ho primeiru no segundu siklu.
“Iha kurrikulu ida nee ita koko eleba ita nian aan, atu bele hanesan dezenvolvimentu edukasaun global ita adere ba edukasaun seklu 21, neebe maka agora ita hatama materia mudansa klimatika, ita mos introdus abilidade estudantes,” nia tenik.
Nia dehan, lori tinan 10 dezde hahu implementa kurríkulu foun hodi prepara ba kurríkulu siklu datoluk neebe foin lalais nee hetan revizaun. Nunee ohin loron espesial duni, tanba marka preparasaun dahuluk ba implementasaun klase 7, neebe sei hahu iha tinan oin. Ida nee signifika katak too 2028 sei implementa tomak ona kurríkulu ensinu baziku foun, neebe komprensivu.
ME Dulce akresenta, abertura ida nee serve hanesan odamatan ba serie formasaun tomak, inklui sesaun formasaun 10 nee ba formador sira, neebe sei eskala iha semana balun nia laran, no tuir mai sesaun formasaun ba profesor sira iha nivel administrativu. Hodi fo formasaun iha nivel administrativu, ida nee signifika katak profesór barak sei hetan formasaun diretamente iha sira nia eskola, neebe tuir peskiza hanesan dalan diak liu atu aprende.
Jornalista: Jacinta Sequeira
Editor: Domingas Gomes
