DILI, STLTIMORLESTE.com – Estudantes husi Eskola Sekundariu Jeral (ESJ) FINANTIL kada loron asesu ba iha biblioteka no balun impresta livru lori ba uma.
Ofisiais Biblioteka ESJ FINANTIL, Adilson Viegas Esperito Santos dehan, kada loron estudantes CT no CSH sempre asesu mai iha biblioteka, maizumenus nain tolu nolu nee kada loron mai asesu biblioteka eskola nian.
“Livrus sira nee dala ruma sira lee iha nee, dala ruma sira halo rezumu, dala ruma sira mai halo sira nian TPC iha nee. Ami nia biblioteka nee iha lista impresta nian no iha mos lista prezensa nian,” dehan nia ba jornalista STL iha nia knaar fatin Aimutin, Sesta (29/08/2025).
Nia dehan, kuandu livrus sira nee estudantes sira impresta, loron tolu sira impresta livru ida, maibe loron tolu sira tenke entrega fali. Fatin mak ladun sufisiente ba estudantes sira, tanba kada loron atende estudantes tolu nolu nunee, neebe presiza espasu neebe luan para estudantes sira bele book aan diak.
Jornalista: Jacinta Sequeira
Editora: Domingas Gomes
