DILI, STLTIMORLESTE.com – Primeiru Ministru (PM), Kay Rala Xanana Gusmão haruka ona karta ba Prezidente Republika Indonezia, Prabowo Subianto, oinsa buka dalan hamutuk rezolve problema iha fronteira.
Xefe Governu hatoo kestaun nee ba jornalista sira bainhira remata halao enkontru semanal ho Prezidente Republika, Jose Ramos Horta iha palasiu Prezidensial, Nicolau Lobato, Bairru Pite, Sesta (29/08/2025).
Primeiru Ministru informa ba Prezidente Republika katak, nia hasoru malu ona ho delegasaun husi Indonezia, ba enkontru formal kona-ba fronteira marítima.
“Rezultadu ita labele temi kedas ona rezultadu, maibe ita temi katak sira mai ho vontade atu loke an ba diskusaun neebe diak. Hau informa ba Prezidente Republika katak tinan ida nee sei iha tan enkontru ida, iha ona planu tinan mai nee enkontru mínimu haat.Neebe tinan ida nee, too fim do anu sei iha enkontru ida iha fali sorin neeba,” dehan PM, Xanana.
Xefe Governu dehan, mai hasoru Prezidente Republika hodi informa katak, kona-ba problema neebe akontese iha Fronteira dadaun nee Primeiru Ministru, haruka ona karta ba Prezidente Indonezia, nomos Ministrtiu relevante oinsa bele buka dalan rezolve problema refere.
“Aproveita hau informa ba Prezidente Republika kona-ba problema neebe mosu daudauk Oecusse neeba, sim, iha neeba, hau hakerek tiha ona karta retira ba Prezidente Republika Indonezia, Prabowo Subianto. Hakerek mos surat ba Embaixador iha nee, hodi dehan buka took, tanba ita nia temi karik, sira mak nian mak dehan fali ita mak neebe halo misaun konjunta ida atu investiga didiak, tanba labele akontese tan,” katak Xefe Governu.
Aleinde nee Primeiru Ministru, Kay Rala Xanana Gusmão informa ba Prezidente Republika, ho hanoin katak, tinan mai lao haleu Timor kona ba desentralizasaun, governu lokal.
“Iha Oecusse mos fulan hirak liu ba hasai tiha ona rezolusaun katak sei hapara, tanba nee mak foin loron Kuarta-feira nee ami hapara Rogerio Tiago Lobato ninia mandatu ho João Mendes Gonsalves ninia mandatu. Governu agradese tebe-tebes ba sira, kontribuisaun neebe sira halo, esforsu boot neebe sira halo, maibe komu atino sira dala ruma koalia ho hau dehan, iha fatin hotu-hotu iha rai boot neeba munisípiu nia oan mak tau iha neeba, ami nee, ami la vale kedas ona ka. Neebe iha Oekusse mos Konselhu Ministru aprova tiha ona rezolusaun ida, nomea estrutura foun ida provizoriu ba fulan tolu too Novembru,” hatete PM, Xanana.
Jornalista: Emerenciana Pinto
Editora: Carme Cimebes
