DILI, STLTIMORLESTE.com – Prezidente Republika (PR), Jose Ramos Horta hatete, nia parte apoiu Parlamentu Nasional (PN) sosa kareta, bainhira deputadu sira nia mandatu remata kareta la lori ba uma no nafatin hela iha Parlamentu Nasional.
Prezidente Republika Jose Ramos Horta hatoo kestaun nee ba jornalista sira bainhira fila hikas mai Timor Leste iha Aeroporto Internasional Nikolao Lobato Komoro, Sesta (29/08/2025).
“Hau lakoinese kareta parlamentu nian, hau hatete deit mak ida nee iha prezidensia hahu 2022 hau la autoriza sosa kareta foun, ba Prezidensia sosa deit trek rua foun para lori sasan ba foho, sosa mini bus para konvidados husi liur mai atividade barak maibe kareta foun ba prezidente nia staf sira laiha. Ba hau ida nee laos problema boot ida, tanba laos folin boot tebes, laos ho ida nee mak preokupa ho osan. Labele kada tinan 5 sosa kareta foun hanesan hau rona deputadu balun koalia nee laos kareta ba deputadu, maibe nee kareta ba instituisaun parlamentu para halo serbisu. Nee signifika kareta nee sosa, maibe kuandu deputadu sira nia mandatu remata no kareta nee kontinua para iha parlamentu, se nunee ba hau laiha problema,” dehan Horta.
Nua afirma, se informasaun neebe rona husi deputadu balun hatete, kareta nee laos sosa ba deputadu sira maibe sosa ba instituisaun, nunee deputadu sira uza hodi halo fiskalizasaun. Bainhira mandatu hotu kareta sira nee hela nafatin iha parlamentu no deputadu seluk mai kontinua uza hodi halo serbisu.
Jornalista: Emerenciana Pinto
Editora: Domingas Gomes
