DILI, STLTIMORLESTE.com – Bainhira eskola sekundariu balun menus livru, Ministeriu Edukasaun (ME) husu ba Diretor Eskola sira atu halo pedidu ba Ministériu.
Liafuan nee haktuir husi Diretor Nasional Ensinu Sekundariu iha ME, Benjamin Gomes da Cruz Fernandes ba jornalista STL, Tersa (02/09/2025).
“Ita nian eskola neebe sei menus livrus, sira tenke halo pedidu mai ami. Kuandu bainhira pedidu ida la tama mai, nee ami atu hatene oinsa. Nee duni husu ba ita nian eskola neebe menus livrus para hatoo pedidu mai Ministériu, nunee kurrikulu bele halo distribuisaun livru ba sira bazeia ba ita nian nesesidade eskola nian,” afirma nia ba STL, Tersa (02/09/2025).
Nia akresenta, husu ba Diretor Eskola sira atu identifika livrus ba disiplina neebe mak sei falta iha sira nian eskola, halo pedidu mai iha diresaun nasional.
Nia parte mos husu ba estudante sira katak, livrus neebe mak iha ona nee estudantes sira tenke lee, labele rai deit iha biblioteka, maibe oinsa mak sira atu asesu nafatin livrus sira nee lee, tanba livrus balun distribui ona ba eskola sira.
Entretantu Diretor Eskola Sekundariu Jeral no 4 Setembru Balide, Sergio A. da Cruz hatete, sira iha biblioteka, maibe livrus ba disiplina balun too agora sei falta. Loron-loron estudantes sira asesu ba livrus sira nee hodi haree no lee iha biblioteka.
Jornalista: Jacinta Sequeira
Editora: Domingas Gomes
