DILI, STLTIMORLESTE.com – Movimentu Timor Avante (MOTIVA) harii sai hanesan kanal ida neebe kontribui no prepara foinsae sira iha Timor Leste hodi kontribui ba dezemvolvimentu rai laran.
Kestaun nee hatoo husi Prezidente Movimentu Timor Avante, Fidelis Leite Magalhaes ba jornalista sira, bainhira remata halo enkontru ho Prezidente Republika, Jose Ramos Horta iha Palasiu Prezidensial, Nicolau Lobato, Bairo Pite, Sesta (05/09/2025).
“Liu husi MOTIVA hanesan kanal ka plataforma ida kontribui, neebe ita bele envolve no prepara kontribui forma simples hodi prepara foinsae sira. MOTIVA fulan hirak liu ba ami dehan sei pauza uitoan lai, tanba iha fulan rua nia laran, ami sei re-organiza an, sei mos ferias tanba líder organizasaun nian balun auzente, mais ami dehan ona atividade sei hahu fila fali iha fulan Setembru ba oin,” dehan Prezidente MOTIVA, Fidelis.
Oinsa ho Movimentu Timor Avante nia Vizaun no misaun atu indepedente ka oinsa hatan ba kestaun nee Fidelis dehan, organizasaun hotu-hotu signifika hotu hotu iha dever, patriotiku nian kontribui.
Agora atu kontribui oinsa importante liu mak bele halibur ema hamutuk iha mahon ida, hanesan organizasaun organiza malu. Kona-ba futuru nia objetivu prinsipal agora prepara foinsae sira.
“Kona-ba nia futuru atu halo saida, nee sosa kabe ba ema ida deit atu deside, nee kabe ba membru organizasaun sira hotu mak depois sei tur hamutuk, depois sei define dehan atu ba oin nusa, forma diak liu saida mak ita bele halo hodi kontribui ba ita nia rai. Nee laos ba ema ida deit, hau mak deside ida nee, tuir planu katak iha tinan oin ami konferensia ida, iha konferensia nee mak membru sira hotu, sei iha forma neebe nakloke, demokratika, transparente, moderna, atu halo diskute ho respeitu malu, mais diskute ida ho lori naha todan nasaun iha kabas depois deside,” katak nia.
Nia hatete, husi forum mak deside se karik kontinua organizasaun massa halibur malu deit ka halo buat seluk ka, nee depois mak membru sira sei deside.
Informasaun katak MOTIVA mos sei rejistu sai hanesan partidu polítiku ida, nee loos kalae, hatan ba kestaun nee nia dehan, futuru depende membru sira mak hakarak sei deside, laos nia atu pronunsia agora atu halo saida.
Karik membru apoiu rejistu sai partidu polítiku oinsa hatan ba kestaun nee Fidelis dehan Demokrasia nee laos ema ida deit mak atu deside, iha prinsipiu demokratiku katak tenke sukat hotu posibilidade sira, haree vantazen no dez-vantazen sira, haree oinsa bele kontribui ldezenvolve rai nee ho diak liu tan.
Depois iha nee mak desizaun iha rasional dehan ok halo hanesan nee ka, halo hanesan neeba. Mais maioria deside, klaru hotu-hotu tuir buat neebe maioria deside.
Nia hatutan, total membru MOTIVA ida fiksu nee atus rua ka atus tolu hanesan nee. Mais ho membru sira neebe partisipa tuir eventu sira ho kolaborasaun ho aliansa nakloke sira neebe MOTIVA halo sempre ho aliansa nakloke ho grupu sira hotu nee barak liu ida nee, dala ruma iha eventu balun iha rihun rua, maibe depende kada eventu deit.
Jornalista: Emerenciana Pinto
Editora: Carme Ximenes
