DILI, STLTIMORLESTE.com – Prezidente Republika (PR), José Ramos Horta apresiasaun boot ba Republika Popular Xina neebe apoiu Timor Leste (TL) fo impaktu ba Setor Saude.
Iha Loron Sesta nee (05/09/2025) Prezidente Republika José Ramos Horta Elogia kontribuisaun vital husi Xina ba saude Timor Leste.
Prezidente Republika hatoo ninia apresiasaun boot liu ba Republika Popular Xina ba sira nia apoiu kleur ona no ho fo impaktu makaas ba setor saude Timor Leste. Hodi rekonhese relatoriu neebe simu kona-ba Ekipa Medika Xina ba dala 10.
Xefe Estadu elojia parseria dekada rua neebe lori ona profisional mediku hamutuk 123 mai Timor Leste.
Hahu husi 2003, ekipa sira nee halao ona konsulta 249,000 liu no halo liu sirurjia 22,000, hodi hatudu espíritu dedikasaun ida neebe salva ona vida barak tebes no hametin sistema saude nasional.
Ekipa atual ho ema hamutuk nain 12 husi Provínsia Sichuan, kontinua legadu notavel nee ho abilidade esepsional iha Hospital Nasional Guido Valadares (HNGV).
“Iha deit tinan ida ho balun nia laran, sira atende ona kazu rihun ba rihun no sira hatama prosedimentu mélediku pioneiru oin-oin ba Timor Leste ba dahuluk. Avansu sira nee inklui sirurjia minimamente invaziva no teknika inovadora sira iha obstetrísia no ortopedia, reprezenta saltu signifikativu ba oin iha kualidade kuidadu saude neebe disponível ba ita nia sidadaun sira no transferensia konhesimentu neebe importante ba ita nia mediku lokal sira,” dehan PR Horta.
Prezidente Ramos Horta destaka mos kompromisu metin husi ekipa nee ba saude komunitaria, neebe liu mos ba hospital sira seluk. Mediku sira lao ona iha termritoriu laran tomak, husi ilha Atauro too sidade Laga no Likisa, hodi halo klínika gratuita ba família Timoroan atus ba atus. Aleinde nee, inisiativa sira hanesan programa “Hamnasa ba Labarik sira ho Ibun Midar” no formasaun iha Reanimasaun Kardiupulmonar (RCP) no primeiros-socorros neebe fo kbiit ba komunidade lokál sira no responde ba nesesidade saude krítika.
Xefe Estadu hatete, Povu Xina liu husi ekipa medika sira-m neebe dedikadu, laos deit trata pasiente sira maibe sira ajuda harii futuru ida neebe saudavel no reziliente.
Sira nia kontribuisaun sira folin boot tebes no Estadu Timor Leste hein atu kontinua kooperasaun vital ida ne’e no salva vida ida nee ba tinan barak tuir mai.
Jornalista: Emerenciana Pinto
Editor: Xisto Mendonça
