DILI, STLTIMORLESTE.com – Conferência Episcopal Timorense (CET) konvida sarani sira hotu partisipa iha misa agradesimentu primeiru aniversariu vizita Sua Santidade Papa Francisco iha Timor Leste, neebe realiza iha loron 10 Setembru 2025, iha Tasi-Tolu.
Misa agradesimentu primeiru aniversariu vizita Sua Santidade Papa Francisco iha TL hahú tuku 06.00 loraik, misa sei prezide husi Arsebispu Arkedioseze Metropolitana Dili, Dom Virgilio Cardeal do Carmo da Silva, SDB.
“Ho fuan nebe nakonu ho ksolok no gratidao, CET convida sarani sira hotu atu mai partisipa iha santa misa acao de grasa nian, ba okaziaun primeiru aniversariu visita Sua Santidade Papa Francisco nian mai rai doben TL, ita nia fuan no neon sei manas hela hodi hanoin presenza historiku Maktoban Papa Francisco nian iha ita rain, iha loron 9 too loron 11 fulan Setembro tinan 2024, Papa nia vizita sai nuudar bensaun ida ba ita nia nasaun no liu husi nia enkontru sira ho ukun nain sira, ho katuas no ferik sira, ho foinsa’e sira, ho labarik sira no ho ema moras sira, hatudu duni katak Papa nia domin boot povu Timor nebe simples no fiar nain. Nia prezenza iha ita nia le’et, hametin liu tan ita nia fiar, hafoun fila fali ita nia esperansa no nia husik hela marca ida nebe labele hasai hosi ita hotu nia fuan,” hatete Sekretariu Ezekutivu CET, Padre Carlos M.P. Roben liu husi konferensia imprensa iha CET Bidau Mota Klaran, Sesta (5/09/2025).
Iha data espesial ida nee, husu sarani hotu tau hamutuk orasaun atu agradece ba Maromak ba graca husi presenza Santo Padre nian iha ema idak-idak, ba nia liafuan sira nebe fo coragen no ba gestu konkretu sira neebe hatudu nia domin paterno, proximidade no atensaun nebe nia fo mai Timor oan hotu, molok nia fila hikas ba Roma, iha enkontru ho foinsa’e sira nia husik hela menon ida nee.
“Hau sei husik hela rai ida nee, nebe nakonu ho hamnasa, ho imi nia oin midar sira no ho esperanga katak imi hotu iha ha’u nia fuan, Maromak haraik bensaun ba imi hotu”, No Papa deklara iha nia viagem fila ba Roma, ho liafuan murak ida nee, Hau nia laran monu tiha ona ba TL tan Papa nia domin ida boot nunee, ita fiar katak oras nee Maktoban Papa Francisco, harohan hamutuk ho Santo no Santa sira iha Lalehan mai rai no povo doben Timor Leste.,” hatete Pe. Carlos.
Iha Fatin hanesan Prezidente Ezekutivu Komisaun Nasional Juventude Katolika Timor Leste (CNJCTL) no Koordenador Geral Ekipa Sinodal, Padre Francisco Indra do Nascimento Tey Seran hatete, programa selebra tinan ida vizita Sua Santidade Papa Francisco iha TL, CET fo confiansa ba Comisaun Nacional Juventude Catolica Timor-Leste (CNJCTL) liu husi Eguipa Sinodal neebe envolve foinsa’e sira husi Komisaun Diosezana tolu, Movimentu Juvenil Catolica no Universitario sira hodi sai nu’udar responsavel maximo ba programa celebrasaun tinan ida vizita Sua Santidade iha TL.
Programa sira neebe sei halao iha dia 10 de Setembro de 2025 mak hanesan misa agradecimento ho horas, 18:00 lokraik, prezide husi Sua Eminencia Dom Virgilio Cardeal do Carmo da Silva, SDB, depois de nisa, sei iha sasin ka partilha kona ba Santo Padre nia visita ho horas: 20:00-21:00, Concerto “Joven Barulho”, ho Horas: 21:30 ate remata neebe sei anima husi Banda Nacional, Banda Comissao Diocesana, Movimento Juvenil Catolica no Asosiasaun Juventude Independente liu husi programa sira nee, konvida sarani hotu atu bele participa hodi hanoin hikas Sua Santidade Maktoban Papa Francisco ho nia menssagen sira neebe husik hela mai iha rai doben TL. Belun foinsa’e sira no sarani tomak keta haluha halo fiar sai Hanesan Ita nia Cultura, (Oue a Vossa Fe, Seja a Vossa Cultura).
Jornalista: Joaninha Belo
Editora: Domingas Gomes
