DILI, STLTIMORLESTE.com – Ministeriu Justisa (MJ) preve milhaun US$ 1 resin iha Orsamentu Jeral Estadu (OJE) 2026, hodi halo akizasaun ba kaderneta pasaporte.
Diretor Jeral Servisu Rejistu Notariadu (DGSRN), Agostinho Gonsalves Viera hateten, Ministeriu Justisa preve ona milhaun US$ 1 resin iha OJE 2026, hodi halo akizasaun ba kaderneta pasaporte hamutuk rihun 75.
“Ita preve ona iha orsamentu tinan oin ho osan milhaun US$ 1 resin atu halo tan akizasaun ba kaderneta pasaporte rihun 75,” dehan Agostinho ba jornalista sira iha nia knaar fatin Kolmera, Sesta (05/09/2025).
Tuir nia, orsamentu nee aprezenta ba komite revizaun orsamentu, no komite mos konsidera katak nee importante.
Nia argumenta, agora husi Diresaun Servisu Rejistu Notariadu hamutuk ho Ministeriu Justisa halo ona kontaktu ho empreza produsaun Thales hodi prepara ba akizisaun pasaporte rihun 75 iha tinan oin.
“Empreza nafatin ho Thales, agora halo ona komunikasaun ho empreza nee no hein kuandu orsamentu tinan oin aprova, mak iha fulan Marsu tinan oin bele hahu halo ona akizisaun,” nia tenik.
Nia afirma, agora daudaun stok pasaporte neebe sei iha Diresaun Servisu Rejistu Notariadu hamutuk 63.000, no stok ida nee sei koresponde ba too fulan Dezembru.
Iha fatin ketak, Estudante Sebastião Dos Santos dehan, presiza iha planu hodi kontinua halo akizasaun atu labele akontese hanesan uluk.
“Kontinua iha planu atu halo akizasaun atu labele akontese hanesan uluk, tanba oras nee daudaun publiku barak mak trata pasaporte hodi sai ba liur,” dehan nia.
Nia husu atu funsionariu sira mos kontinua servisu tuir regra neebe iha, hodi atende publiku ho diak.
Jornalista: Terezinha De Deus
Editor: Xisto Mendonça
