BAUKAU, STLTIMORLESTE.com – Ema deskonhesidu naok labarik sira iha Fundasaun Casa Esperansa Orfonatu (FCEO) nia animal hakiak, iha Tualeku, Munisipiu Baukau.
Diretora FCEO, Cesaltina de Carvalho Soares hatete, labarik sira neebe hela iha FCEO husi kondisaun moris familia divorsiu, kbiit laek no seluk tan, tanba nee hakarak hakiak animal hanesan manu no fahi ba objetivu nuudar meius ida eduka labarik sira sai forte ba nia nesesidade ekonomia rasik iha futuru, no objetivu seluk mak hakarak hakiak bainhira boot bele faan hodi sustenta nesesidade sira iha Orfonatu, maibe ema deskonhesidu naok sira naok tiha.
“Moru la seguru ema naok ten mai naok ami nia animal sira dala 3 hanesan nee. Naok fahi kiik 3 manu mak inan rua nia oan sei kiik kous moos hotu, ami nia asu neen hanesan nee aman no inan ida fali ba nia oan 7 ema halo lasu mate tiha deit, ami triste tebes,” hateten Cesaltina ba STL, iha Tualeku, Domingu (07/09/2025).
Nia sublina, razaun prinsipal neebe fo oportunidade ba ema deskonhesidu naok labarik Orfonatu sira nia animal hakiak mak laiha moru protesaun, tanba durante nee labarik sira nia rezidensia lutu la seguru fo oportunidade ba ema deskonhesidu naok labarik sira nia animal hakiak.
Aminal hakiak sira neebe lakon hahu husi tinan 2024 too inisiu 2025 nee, maibe parte FCEO la halo keixa, tanba asaun husi ema deskonhesidu, maibe husi fulan Fevereiru too ohin loron animal sira neebe labarik Orfonatu sira hakiak seguru ona.
“Ami iha duni ona hanoin ida atu ba Autoridade Munisipiu Baukau bele tau matan netik ba ami hakat mai vizita halo reabilitasaun ba Orfonatu ida nee,” Cesaltina katak.
Iha fatin hanesan Labarik Orfonatu, Ezra Zenito akresenta, animal hirak neebe hakiak objetivu atu faan hodi sustenta nesesidade eskola no seluk tan, maibe ema deskonhesidu sira tenke naok, tanba laiha moru protesaun hodi projete, nuee husu Autoridade Munisipiu Baukau nia tulun liu liu konstrui moru protesaun.
Too notisia nee publika jornalista STL, seidauk hetan konfirmasaun husi Autoridade Munisipiu Baukau, tanba loron feriadu.
Entertantu labarik nain 24 kompostu feto 11 mane 13 idade husi 3-16 mai husi Munisipiu Baukau, Likisa, Lautem no Oekusi neebe husi tipu moris familia divorsiu, kbiit laek no seluk tan.
Jornalista: Tomas Reis
Editora:Carme Ximenes
