BAUKAU, STLTIMORLESTE.com – Labarik sira iha Fundasaun Casa Esperansa Orfonatu (FCEO) Tualeku Baukau, moris ho ambiente la ijiene, tanba sofre ba bee moos inklui uma neebe sira hela ba kondisaun janela no odamatan aat.
Diretora FCEO, Cesaltina de Carvalho Soares esplika, Fundasaun Casa Esperansa Orfonatu (FCEO) estabelese husi misionariu Malazia sira iha tinan 2008 no konstrui uma foun iha tinan 2014 ba, ho objetivu atu fo mahon ba labarik sira neebe husi familia divorsiu, kondisaun kbiit laek no seluk tan neebe hakarak asesu fatin refere.
Uma neebe minisonariu sira konstrui hela ho medida 29X28 ba modelu L fahe ba parte 2, parte ida kuartu toba fatin 3 ho medida luan kompleta kedas fatin sanitasaun 5 iha sorin, enkuantu parte 2 kuarta 3 ho medida luan no kompleta fatin sanitasaun 1 iha sorin neebe husi inisiu too ohin loron fo mahon ba labarik benefisiariu nain 94 mai husi kondisaun moris oan kiak, kondisaun familia kbiit laek no husi familia divorsiu.
Labarik sira neebe atual hela iha FCEO hahu husi idade 02-16 rejistu hamutuk nain 24 kompostu feto 11 mane 13 idade husi Munisipiu Baukau, Likisa, Lautem no Oekusi neebe iha tinan 2025 hetan apoiu fundu rihun US$ 18 husi Ministeriu Solidariedade Sosial no Inkluzaun hodi responde ba nesesidade alimentasaun, saldo eletrisidade no nesesidade ba labarik sira nia eskola, maibe durante nee enfrenta bee moos hodi implika labarik sira nia saude, tanba ambiente la hijiene.
“Difikuldade neebe enfrenta mak bee moos dala ruma laiha ami lori sira tenke ba iha kota lama hariis no fase ropa, sabadu sabadu ami tenke ba Uailili, tanba bee laiha entaun difikuldade mak hijiene nee mak sira kuran tebes,” hateten Cesaltina ba STL, iha Orfonatu Tualeku, Domingu (07/09/2025).
Nia sublina, bee moos neebe BTL oferese liu husi kalanilazasaun semana ida dala 2 kobre oras 2 ba loron ida, nunee la sufisiente, tanba labarik Orfonatu barak.
Tanba tuir nia bee moos neebe falta kada semana loron sabadu tenke ba buka bee iha area Vila Antiga no Uailili hodi fase ropa, maibe preokupa kondisaun seluk hanesan rai rahun iha uma oin no uma laran la rega, tanba bee laiha, nunee anin hun lori tama rai rahun ba uma laran implika ba labarik sira nia saude, tanba uma kondisaun la duun dignu liu liu janela aat ona no uma laran la tau kremik neebe bainhira tempu labarik idade kiik sira halimar iha rai fasil afeta ba sira nia saude.
“Ami ba tiha ona iha BTL hodi dada fali ami nia bee, maibe dehan hein ami fo karta ba too agora mos seidauk iha despaisu ida, tempu besik ami sei ba komfirma ami nia karta neebe distribui ona iha BTL,” Cesaltina akresenta.
Nia deklara, husi problema falta bee moos durante nee afeta ona ba labarik sira nia saude hanesan mear no inus metin, tanba kauza husi rai rahun, nunee iha fulan hirak liu ba submete ona pedidu ba Bee Timor-Leste Empreza Publiku Munisipiu Baukau atu halo kanalizasaun ketak hodi oferese bee permanante ba labarik sira iha Orfonatu, maibe too ohin loron seidauk iha resposta.
Iha fatin hanesan, labarik Orfonatu Queiza Julmira Lopes sente triste, tanba durante nee bee moos neebe sira utiliza husi kanal BTL la sufisiente, nunee tenke ba area Vila Antiga no Uailili hafoin asesu bee moos hodi hariis inklui uma hela fatin la seguru.
“Ami nia uma iha nee kondisaun la-diak, ami mesak labarik kiik oan deit, ami nia janela la-diak ami tauk, ami nia uma seidauk taka keramik rai rahun deit halo ami moras husu Autoridade Munisipiu Baukau hadia ami nia uma,” katak Queiza.
Too notisia nee publika jornalista STL seidauk hetan konfirmasaun husi Autoridade Munisipiu Baukau no parte BTL, tanba loron feriadu.
Jornalista: Tomas Reis
Editora: Carme Ximenes
