Prevene Konflitu, Manifestasaun Tenke Tuir Regra

DILI, STLTIMORLESTE.com – Xefe Departamentu Prevensaun Konflitu Komunitariu Komando Jerál Polisia Nasional Timor Leste (PNTL), Superintendente Polísia Joni Viana halo aproximasaun ba Estudante Universitariu Timor Leste (EUTL) atu halo manifestasaun neebe pasífiku, hatoo aspirasaun no prevene krimi.

“Ohin ami mai iha nee atu halo aproximaun ba ita nia estudante univertariu katak, sira bele halo manifestasaun iha aredores UNTL, maibe manifestasaun neebe pasífiku tenke hatoo aspirasaun no labele iha konflitu,”hatete Xefe Departamentu Prevensaun Konflitu Komunitariu Komandu Jerál PNTL, Superintendente Polísia Joni Viana ba jornalista sira iha UNTL oin, Segunda (15/09/2025).

Nia dehan, estudante konkorda katak sira halo manifestasaun iha deit resintu UNTL no la sai ba estrada.

“Sira mos konkorda katak halo deit manifestasaun dentru aredór UNTL nian no la sai estrada,” nia esplika.

Viana hateten, polísia garante seguransa ba manifestante hatoo sira nia aspirasaun.

“Manifestasaun nee atu hatoo aspirasaun no hanoin sira, ita tenke kumpri regra manifestasaun nian, nunee evita konflitu no bele garante pas no estabilidade,” nia informa.

Nia husu ba estudante sira labele halo asaun oin-oin hodi rezulta buat neebe hotu-hotu lakohi atu akontese.

Iha fatin hanesan, Estudante Universitariu Timor Orientál, Marndo Maubere dehan, nia tuir manifestasaun nee atu hatoo nia hanoin no aspirasaun hodi husu ba Parlamentu Nasionál atu hapara sosa kareta, no aloka osan neebe atu hola karreta nee ba fali parte seluk.

“Ami nia ezijensia nee ba PN, atu husu favór hapara hola karreta hodi ajuda ba ema kbiit laek tanba Timor oan barak mak sei kiak,” nia deklara.

Nia koalia, PN la banati ona luta nain sira nia luta, maibe buka di’ak ba sira nia aan iha tempu ohin loron, tanba ezijensia nee atu hatoo katak hapara sosa kareta.

Tuir obrservasaun STL iha terenu katak, manifestante sira nee husi Estudante Universidade Nasionál Timor Leste (UNTL), Universidade Dili (UNDIL), Universidade Orientál Timor Leste (UNITAL) no Universidade da Paz (UNPAZ), ativista, grupu sosiedade sivil inklui komunidade balun neebe partisipa iha manifestasaun nee konsentra hotu iha resintu UNTL laran, hodi hahu halo ona manifestasaun, hakilar no hatoo sira nia aspirasaun.

Jornalista: Jeniche da Costa
Editora: Domingas Gomes