DILI, STLTIMORLESTE.com – Ohin Primeiru-Ministru (PM), Kay Rala Xanana Gusmão, hala’o viajen hodi partisipa iha Simeira ASEAN ba dala 49 ne’ebé sei hala’o iha Manila, Repúblika Filipinas, hosi 11 to’o 18 Novembru 2026.
Partisipasaun PM Xanana iha enkontru rejionál ne’e, sei reprezenta Timor-Leste iha diskusaun no enkontru nível lideransa ho Estadu-Membru ASEAN, parseiru diálogu no organizasaun internasionál, ho objetivu atu hametin kooperasaun rejionál no promove interese nasionál Timor-Leste.
Programa ofisiál Simeira ASEAN hahú ho enkontru preparatóriu iha nível funsionáriu seniór no ministru sira, molok kontinua ho enkontru nível Xefe Estadu no Xefe Governu nian.
Tuir ajenda, iha 15 Novembru, PM Xanana sei partisipa iha serimónia abertura 49 Simeira ASEAN, ne’ebé sei inklui aprezentasaun Akordu Kuadru bá Ekonomia Dijitál (Digital Economy Framework Agreement), inaugurasaun símbolu ASEAN ne’ebé atualiza, hasae bandeira ASEAN foun no serimónia entrega ASEAN Prize.
Iha loron hanesan, sei hala’o 49º Simeira ASEAN iha sesaun plenária no sesaun retreat, ne’ebé sei fó oportunidade bá líder sira atu diskute asuntu estratéjiku ne’ebé relevante bá futuru ASEAN no kooperasaun entre Estadu-Membru sira.
PM Xanana mós sei partisipa iha enkontru entre Líder ASEAN ho reprezentante hosi Parlamentu ASEAN (AIPA), reprezentante juventude ASEAN no Konsellu Konsultivu Negósiu ASEAN (ASEAN-BAC). Enkontru sira-ne’e sei aborda kontribuisaun hosi parlamentu, juventude no seitór privadu bá prosesu dezenvolvimentu no integrasaun rejionál.
Iha 16 Novembru, PM Xanana sei partisipa iha Simeira ASEAN ho parseiru sira, inklui Repúblika Populár Xina, Repúblika Koreia, Nasoins Unidas no Austrália. Enkontru sira-ne’e sei fó oportunidade atu hametin relasaun kooperasaun entre ASEAN no parseiru estratéjiku sira.
Iha 17 Novembru, ajenda sei kontinua ho Simeira ASEAN ho Parseiru Tolu (ASEAN Plus Three), Reuniaun Lideransa Komunidade Ázia Zero Emisaun (AZEC), Simeira ASEAN-Japão, Simeira ASEAN-Índia no 21º Simeira Ázia Leste (East Asia Summit–EAS).
Iha loron hanesan, sei hala’o serimónia enseramentu 49º Simeira ASEAN no Enkontru Relasionadu, hamutuk ho serimónia entrega Prezidénsia ASEAN bá Singapura, ne’ebé sei assume lideransa ASEAN iha períodu tuirmai.
Enkontru sira-ne’e sei sai parte importante hosi esforsu ASEAN atu hametin unidade, estabilidade, seguransa, prosperidade ekonómika no kooperasaun ho parseiru internasionál, iha kontestu dezenvolvimentu rejionál no mundiál.
Partisipasaun PM Xanana iha Simeira ASEAN ne’e mós reprezenta kompromisu Timor-Leste nian atu kontinua kontribui bá prosesu integrasaun rejionál, depois sai membru permanente ASEAN nian nu’udár Estadu-Membru 11º, iha 26 Outubru 2025.
Programa ne’e sei remata ho partida delegasaun sira iha 18 Novembru 2026.
Tuir observasaun STL iha Aeroportu Internasionál Prezidente Nicolau Lobato Dili, PM Xanana ba Filipina ho Aviaun Aero Dili iha Tuku 9:00 dadersan.
(jos)
