DILI, STLTIMORLESTE.com – Juiz nain 12 neebe simu ona pose hodi sai hanesan Juiz estajiadu, sei halao estajiu durante tinan ida no tenke kumpri regra neebe Juiz orientador sira fo, tanba sira mak sei avalia durante estajiu.
Dehan Membru Konselu Superior Majislatura Judisial, Alexandre Corte Real ba STL, iha Kaikoli, Dili, Segunda (15/09/2025).
“Sira estajiu durante tinan ida husu atu sira bele kumpri orientasaun neebe Juiz orientador sira fo, atu sira bele hetan rezultadu masimu, tanba sira sei iha estajiu hela tenke hatudu sira nia an katak, aban bainrua sira sai duni Juiz tuir orientasaun neebe orientador sira halo,” dehan Alexandre.
Juiz estajiadu tuir nia laos ona faze final, tanba nee durante tinan ida sira tenke halo tuir regra neebe iha, se sira la tuir regra nee no rezultadu husi orientador la dun diak sira mos labele pasa.
Tanba sira Juiz ona maibe sei estajiadu hela katak, tinan ida fo ba sira atu tuir regra neebe Juiz orientador sira fo ba sira, no sira sei fahe ba Tribunal haat nee halo rotasaun fulan tolu iha Tribunal ida no fulan tolu iha Tribunal ida, atu kobre hotu iha Tribunal haat nee.
Iha fatin ketak, Jurista Sergio Dias Quintas dehan, Juiz estajiu sira nee bele aproveita tempu estajiu hodi halao knar,”Juiz nain 12 neebe foin dadaun toma posse hodi ezerze sira nian funsaun nudar Juiz estaziariu, ita espera katak sira bele aproveita tempu estajiu nee,” dehan Sergio.
Nia hatutan, Juiz sira nee tenke aproveita diiak, atu nune tinan tuir mai sira bele sai Juiz karreira ida neebe bem kualifikadu, hodi nune bele fo justisa ida ho kualidade ba ita nia sidadaun sira iha futuru mai.
Aleinde nee, Diretora Sentru Formasaun Juridiku no Judisiaria, Marcelina Tilman dehan, rezultadu husi formados sira nian neebe mai ona husi Portugal, entrega ba iha Tribunal, Prokurador no Defensor, tanba nee sira halao estajiu husi parte sira nee maka sei avalia sira.
“Faze estajiu hanesan ikus ona hodi hare konaba kareira, no husi Juiz nian Juiz sira maka sei halo avaliasaun, husi Prokurador nian husi Prokurador sira maka halo avaliasaun, no mos husi Defensor nian Defensor sira mak halo avaliasaun ba sira durante faze estajiu,” dehan nia.
Jornalista: Terezinha De Deus
Editora: Carme Ximenes
