DILI, STLTIMORLESTE.com – Ministru Planeamentu Investimentu Estratejiku (MPIE), Gastão de Sousa hatete, prosesu aprovizionamentu kona-ba sosa kareta seidauk too iha faze final, tanba nee seidauk iha manan nain ba prosesu sosa kareta.
Gastão hatete, prosesu tenderizasaun kona-ba sosa kareta ba deputadu sira nee iha kompanhia lubuk ida mak konkore balun deskualifikadu, se la sala agora avansa mak kompania tolu maibe seidauk iha manan nain.
“Atu hatoo ba publiku mak nee, seidauk iha manan nain, se manan nain seidauk iha kontratu seidauk iha mak ida-nee deit,”hatete Gastão de Sousa ba jornalista sira, iha edifisiu MPIE, Fatuhada, Tersa (16/09/2025).
Nia hatutan, tuir informasaun neebe iha katak prosesu aprovizionamentu final no hetan ona kampania manan nain iha nee lalos ida, tanba prosesu aprovizionamentu seidauk final.
“Kareta iha ona dalan nee lalos ida, primeiru CNA halo prosesu aprovizionamnetu deit, CNA la deside kareta nee atu hola ka la hola, prosesu aprovizionamnetu para atu hola kareta, desizaun iha Parlamentu Nasional, PN nee orgaun soberania ketak ida,” dehan nia.
Tuir nia, prosesu agora iha Pos-kualification hela, no sei hein relatoriu final, kareta seidauk sosa seidauk iha kontratu ida ke asina manan nain mos seidauk hatene. Parlamentu Nasional deside kansela sosa mak tenke haruka surat mai para hodi kansela prosesu aprovizionamnetu.
“PN dehan prosesu nee kansela tanba hanesan nee prontu ami kansela. Ami seidauk simu surat husi PN,” dehan nia.
Governante nee afirma, se Parlamentu Nasional deside kansela ona sosa kareta ba deputadu sira mak osan tokon US$ 4 ital sei haruka fila fali kofre estadu.
“La sosa kareta osan tama fali kofre estadu nee PN mak hatene, nee sira-nia orsamentu, laos governu nia orsamentu, se governu nia hau. bele hatete katak osan nee ba fali neeba mais nee Parlamentu Nasional nia nia mak hatene tanba PN nee orgaun soberania ketak, Governu labele interven sira-nia atividade lorloron, sira-nia desizaun nee sira-nia desizaun,” hatete governante nee.
Iha Sorin seluk, Sekretariu Jeral Parlamentu Nasional, Edgar Siqueira Martins katak, horiseik hafoin mosu demostrasaun iha Bankada tolu halo deklarasasaun politika atu kansela prosesu sosa kareta ba deputadu sira.
Nia dehan, prosesu aprovizionamnetu seidauk iha faze final tanba seidauk iha Kompania ida mak sai manan nain atu sosa kareta ba Parlamentu Nasional. “Hakarak informa ba publiku katak prosesu akizisaun ba viatura seidauk iha faze final, no iha hela aprovizionamnetu besik hotu, kerdizer iha ona faze ikus atu halo publikasaun, prosesu aprovizionamnetu seidauk final tanba nee kareta ita seidauk sosa,” dehan nia.
Jornalista: Alberto Menezes
Editor: Carme Ximenes
