DILI, STLTIMORLESTE.com – Estudante Universidade Timor Leste (EUTL) hamutuk ho povu aileba sira halao manifestasaun ba loron daruak iha Parlamentu Nasional nia oin, neebe lori poster ka spanduk ho liafuan “Aman Deputadu Naok Osan Povu, Nian Oan Naok Helem”.
Poster ka spanduk ida nee lori husi estudante sira bainhira halao manifestasaun iha Parlamentu Nasional, Tersa (16/09/2026). Estudante lubuk ida iha sira nia poster hirak neebe halo ho liman rasik hakerek fraze uniku neebe kritika hasoru membru Parlamentu Nasional.
“Aman Deputadu Naok Osan Povu Nian, oan Naok Helem,”lee poster ida neebe estudante sira lori, iha manifestasaun nee.
Aleinde nee, iha poster ka spanduk sira seluk neebe lori husi estudante sira ho liafuaan kritiku hasoru membru Parlamentu Nasional no Governu hanesan, ”Sobu ami nia uma sosa imi nia kareta imi komik fali foer loos, fundu petroleum hahu mohu lider politiku ezije moris luxu tau povu no nasaun nia vida iha risku no seluk tan,” hatete poster nee.
Laos ida nee deit sira mos lori Bandeira Republik Demokratika Timor Leste (RDTL), iha loron daruak asaun pasifika ka demostrasaun husi Estudante Universitaria Timor Leste (EUTL) neebe reorganiza forsa hamutuk ho Povu Aileba sira hodi kontra Polisia Nasional Timor Leste (PNTL), tanba bandu manifestante labele halao demostrasaun iha resintu Parlamentu Nasional nia oin.
Hafoin Estudante Universitaria Timor Leste (EUTL) halibur forsa hamutuk sira hakilar Polisia Nasional Timor Leste (PNTL) katak, Polisia naok ten defende Deputadu naok ten, maibe Polisia husu manifestante sira atu halao demostrasaun labele uza anarkizmu. Mas Polisia halo kapturasaun ba manifestante balu, maski sira la halo asaun anarkismu iha manifestasaun nee.
Situasaun sira nee akontese tanba sira la konkorda Parlamentu Nasional sosa kareta foun ba Deputadu iha lejislatura da-6, hamos ka halakon lei pensaun vitalisia, revoga lei numeru 1/2006 artigu 5 kona-ba distansia 100 metru dok husi instituisaun orgaun soberanu antes halao demostrasaun ka manifestasaun.
Iha demostrasaun nee estudante Jose da Costa rekonhese katak, nia hamutuk ho ninia kolega estudante sira seluk neebe marka prezensa iha Uma Fukun Parlamentu Nasional nia oin tanba sira hakarak kontra Parlamentu Nasional sosa kareta foun no hamos lei pensaun vitalisia neebe habokur deit lider politiku sira.
Entretantu iha demostrasaun ba loron daruak nee manifestante balu hetan tiru gas air mata husi Polisia Nasional Timor Leste (PNTL) no kareta, governu ida hetan sunu iha edefisiu ESTATAL nia oin.
Jornalista: Carme Ximenes
Editora: Carme Ximenes
