DILI, STLTIMORLESTE.com – Jurista Sergio Dias Quintas husu ba manifestante sira atu evita violensia iha demostrasaun neebe sira halao.
Nia dehan, pais iha neebe deit iha kompromisu katak, manifestasaun devia halo ho forma pasifiku, organizadu no tuir lei, iha Timor Leste iha norma konstitusional artigu 42 neebe opta, maibe atu manifestasaun la diak, evita violensia.
“Atu manifestasaun lao ho paz para labele lakon nia sentidu manten expresa aspirasaun povu nian, entaun tenki evita violensia no kaer metin nafatin nia objetividade no responsabilidade,” dehan Segio ba STL, iha Kaikoli, Dili, Tersa (16/09/2025).
Tuir nia manifestasaun ho forma violentu no nakonu ho danus sei lakon nia simpatia, no la tuir valor demokrasia neebe nia baze maka pas.
Tanba bainhira manifestante sira halo aksaun demonstrasaun ho forma pasifiku ukun nain sira maka tenki ho atensaun hodi responde imediatu no adekuadu, labele husik let deit aspirasaun nee selae bele fo fatin ba buat neebe ita la espera bele akontense, maibe ida nee kabe ona ba responsabilidade orgaun estadu nian liu-liu PN neebe ohin loron sai problema nia hun.
Iha fatin ketak, Komunidade Suku Komoro, Rafael de Jesus apoiu manifestasaun neebe estudante sira halao. “Apoiu tebes manifestasaun neebe halao husi estudante sira, tanba ohin loron povu barak maka sei moris terus, se atu sosa kareta foun diak liu hare lai povu nia moris,” dehan nia.
Nia husu atu estudante sira koopera ho PNTL hodi manifestasaun neebe iha, tenke lao diak labele hamosu fali situasaun seluk.
Jornalista: Terezinha De Deus
Editora: Carme Ximenes
