DILI, STLTIMORLESTE.com – Komisaun C iha Parlamentu Nasional liu husi Deputada Cedeliza Faria dos Santos, husu ba Konselhu Administrasaun atu tau atensaun ba deputadu sira neebe uza kareta la ho kuidadu ka la tuir regulamentu.
“Hau husu ba Konselhu Administrasaun favor ida ita labele nonok deit ho deputadu sira neebe uza kareta la tuir regras, ba ho kareta hetan asidente monu tiha mai simu fali kareta seluk, buat sira nee Konselhu Administrasaun labele nonok,” dehan deputada Cedeliza iha plenaria PN, Tersa(16/09/2025).
Nia haktuir, diak liu haree sasan sira nee ho diak para ba oin uza kareta parlamentu nee tuir regras, labele lori kareta parlamentu nian, depois familia mak uza kareta nee monu rahun hotu simu kareta foun hodi uza fali.
“Ho hahalok sira nee hau hanoin Konselhu Administrasaun husu favor ba meza PN atu tau atensaun ba sasan sira nee para evita ba oin kareta operasional fo hotu ba deputadu mak uza, agora ita nia operasional atu halo kareta laiha tanba kareta fo hotu fali ba deputadu sira neebe mak uza la tuir responsabilidade, favor Konselhu Administrasaun no Meza PPN tau atensaun,” tenik nia.
Nunee Deputada Cedeliza nia parte la temi deputada ida nia naran, maibe nia agradese tanba Deputada Maria Angelina rekonhese aan.
“Ohin hau la temi deputadu ida nia naran maibe obrigada ba ita boot bele rekonhese ita nia aan, tanba ita nia kareta mak hetan dezastre nee, momentu dezastre ita boot sira mak kaer hela meza hanesan Vise PPN, tanba sa momentu neeba la halo kedas invetigasaun, agora mak foin husu halo invetigasun, tuir lo-loos momentu neeba halo hotu ona ita bele apura tiha kedas ona faktus sira ona,” katak deputada.
Hatan ba preokupasaun nee, Deputada Bankada PLP, Maria Angelina Sarmento katak, nia parte konkorda ho Deputada Cedeliza nia preokupasaun, tanba nee presiza halo regras ba utilizasaun kareta nian.
“Uluk hau rasik husu parlamentu atu loke investigasaun ba kareta neebe mak hetan dezastre, maibe nonok too agora, foin daudaun tinan kotuk hau husu tan tenke apura faktus tanba saida mak too akontese dezastre, se lae ita toman halo akuzasaun falsu sein bazeia ba faktus, resesu nee ita atu halo duni kontaktu eleitoral, nee mak hau sala tiha, hau uza fali kareta ba halo resesu, uza iha resesu durante halo kontaktu eleitoral hodi hetan dezastre nee, entaun tenke loke ivestigasaun,” nia rekonhese.
Jornalista: EST 1
Editor: Xisto Mendonça
