DILI, STLTIMORLESTE.com – Hahu husi tinan 2022 too mai agora Prezidente Republika (PR), Jose Ramos Horta konstrui ona uma dignu ba povu kbiit laek sira hamutuk 31.
Kestaun nee hatoo husi Asesor Sosiedade Sivil Prezidensia Republika, Quintiliano Moniz ba jornalista sira, iha palasiu Prezidensial Nicolau Lobato, Bairo Pite, Dili, Tersa (23/09/2025).
“Ita hahu husi 2022 too mai agora porvolta 31 ital, iha Baucau, Viqueque iha lospalos, Ermera, Bobonaro, oecusse, Atauru ita kontrui hotu,” dehan Quintiliano.
Apoiu halo uma dignu ba povu neebe kbiit laek, ou inan faluk sira tuir nia inisia husi Prezidente Republika, Jose Ramos Horta ho osan Prezidensia Republika nian.
“Programa ida nee inisiativa mai husi ita nia Prezidente Republika nee desde premeiru mandatu husi Prezidente nia politika mak liu liu atu redus probreza hodi ajuda ba ema kbiit naton sira,” dehan Asesor nee.
Maibe nia dehan kriteria nee identifika husi autoridade lokal sira, hatoo proposta ba iha Prezidensia Republika, no ekipa husi Prezidensia ba halo survei mak haree tama duni kriteria prezidensia nia entau fo apoiu.
“proposta mai husi Autoridade lokal, ekipa husi Prezidensia Republika ba halo survey mak kuandu tama duni kriteria neebe mak prezidensia nia iha entau ita apoiu, entau ita enkamina ba Prezidente Republika no Xefe kasa sivil para hetan aprovasaun, karik latama iha kriteria prezidensial nia entau ita enkamina ba Governu para haree,” dehan nia.
Aleinde nee orsamentu ba kontrui uma ba povu kbiit laek husi Prezidensia, no doador husi amigu Prezidente nia apoiu deit ropa, sapatu ekipamentu ba Footbal nia.
“Orsamentu neebe ita uza kontrui uma nee nee orsamentu Prezidensia nia, kada uma ida total 14 mil kinentus dolar I tal ida, nee halo uma kompleta kedas ho fasilidade uma laran, kios kompleta ho fasilidade uma laran haris fatin, dapur kompletu,” katak Asesor nee.
No uma neebe Presidensia Republika halo kompleta kdeas ho dapur, harus, fatin sasan uma laran inklui kios ida ho sasan kios nia mak entrega ba komunidade kbiit naton sira.
Entretantu Prezidente Republika, Jose Ramos Horta buka apoiu nafatin komunidade neebe kbiit naton hanesan balu neebe uma laiha hela iha fatuk kuak, Pezidente buka fo apoiu liu husi halo uma dignu entrega mos ho sasan uma laran inklui mos kios nunee sira bele buka moris.
Jornalista: Emerenciana Pinto
Editora:Carme Ximenes
