DÍLI, STLTIMORLESTE.com – Komisaun Anti Korrupsaun (KAK) kaer motorista na’in tolu (3) tanba uza kareta Estadu ba atividade privadu, inklui lori oan autoridade sira ba eskola.
Diretór Investigasaun KAK, José Verdial, informa ba jornalista sira iha Farol, Tersa (10/11/2026), katak ekipa Investigasaun Kriminál KAK hala’o fiskalizasaun ba veíkulu Estadu no deteta utilizasaun kareta Estadu ba interese privadu.
Operasaun ne’e hahú iha tuku 06:00 dadeer no remata iha tuku 08:20. Ekipa KAK kaptura motorista na’in rua iha Eskola Balide no ida seluk iha Eskola São José Balide.
Verdial esplika katak, motorista sira ne’e utiliza kareta Estadu hodi lori labarik autoridade sira nian ba eskola, ne’ebé konsidera utilizasaun patrimóniu Estadu ba objetivu privadu.
Kareta rua ne’e pertense ba Komisaun Funsaun Públika, no ida seluk pertense ba Tribunal Rekursu. KAK seidauk determina responsabilidade kriminál definitiva, tanba prosesu sei iha faze identifikasaun.
“Estadu fó kareta no motorista atu apoia servisu profisionál, la’ós atu utiliza ba interese privadu.” — José Verdial.
Diretór Investigasaun KAK hateten katak, ekipa sei halo identifikasaun ba suspeitu sira no analiza prova sira ne’ebé rekolla durante operasaun.
Tuir nia esplikasaun, se iha prova sufisiente, KAK sei prepara auto-notísia no haruka prosesu ba Ministériu Públiku, atu promove prosesu tuir dalan legál.
Verdial mós refere ba artigu 218 Kódigu Prosesu Penál kona-ba flagrante delitu, nu’udar baze legál ba atuasaun ne’ebé ekipa hala’o iha terrenu.
Nia afirma katak, KAK nu’udar órgaun polísia kriminál espesializada, iha kompeténsia atu investiga krime pekulatu uzu, no bele halo fiskalizasaun planeada ka asaun insidente tuir nesesidade.
Nia apela ba motorista sira atu kumpre orientasaun tuir lei, tanba obrigasaun atu obedese superior hierárkiku la’ós absoluta, liuliu bainhira orientasaun ne’e kontra lei.
Motorista sira mós tenke asume responsabilidade ba asaun rasik, maski sira hala’o servisu tuir orden superior, se orden ne’e bandu husi lei.
KAK sei kontinua prosesu investigasaun no aprezenta rezultadu ba Ministériu Públiku. Desizaun kona-ba responsabilidade kriminál no prosesu julgamentu sei kabe ba autoridade judisiária kompetente.
Iha sorin seluk, akademiku Universidade Nasionál Timor Lorosa’e (UNTL), Sebastião dos Santos, husu KAK atu reforsa fiskalizasaun ba funsionáriu públiku sira ne’ebé utiliza patrimóniu Estadu la tuir finalidade.
Nia konsidera katak, fiskalizasaun importante atu prevene utilizasaun sala ba rekursu públiku no asegura patrimóniu Estadu uza tuir finalidade.
“Presiza kontrola atu halo prevensaun, atu patrimóniu Estadu uza tuir nia finalidade no interese públiku,” dehan Sebastião dos Santos.
Nia aumenta katak, motorista sira mós tenke utiliza veíkulu Estadu tuir finalidade servisu. Se uza sala, tenke prontu atu responde tuir lei ne’ebé vigora.
(ter)
