BAUCAU, STLTIMORLESTE.com – Reprezentante Partidu Libertasaun Popular (PLP) no FRETILIN iha Munisipiu Baucau, preokupa polítika Governu nian ne’ebé admite de’it kartaun eleitoral biométriku iha eleisaun Prezidensial tinan 2027.
Komisária Komisaun Nasionál Eleisaun (CNE), Teresinha Maria Noronha Cardoso, esplika katak Governu, liuhusi Ministériu Administrasaun Estatal (MAE), ezije eleitores sira ne’ebé atu ezerse sira-nia direitu vota iha Eleisaun Prezidensiál 2027 tenke uza kartaun eleitorál biométriku.
Reprezentante PLP iha Baucau, Alfredo Guterres, husu Governu atu fó fleksibilidade ba eleitores sira atu bele partisipa iha Eleisaun Prezidensiál 2027 no Eleisaun Parlamentár 2028, tanba prosesu atualizasaun kartaun eleitorál ba biométriku seidauk atinji.
“Realidade hatudu katak kartaun biométriku menus loos agora daudaun, tanba ema balu sei utiliza hela kartaun eleitorál tuan. Ohin hateten eleisaun oin mai 2027 no 2028 mak tenke uza kartaun biométriku, analiza lai,” hateten Alfredo Guterres iha salaun STAE Baucau, Tersa (10/11/2026), hafoin enkontru ho ekipa CNE no STAE.
Alfredo mós refere ba dadus STAE Munisípiu Baucau ne’ebé rejista eleitores liu 100.000, maibé husi total ne’e, eleitores na’in 50.000 resin seidauk atualiza sira-nia kartaun eleitorál ba biométriku.
Tanba ne’e, nia defende katak Governu tenke fó oportunidade no fleksibilidade ba eleitores sira atu bele ezerse sira-nia direitu vota, maski seidauk konsege atualiza kartaun eleitorál ba biométriku.
Nia konsidera katak se Governu mantein desizaun atu eleitores hotu-hotu tenke uza kartaun biométriku iha eleisaun 2027 no 2028, ida-ne’e bele limita sidadaun sira-nia direitu konstitusionál atu partisipa iha prosesu eleitoral.
“Eleitores iha Baucau liu 50% seidauk atualiza sira-nia kartaun ba biométriku. Ida-ne’e signifika katak ita limita ita-nia ema atu ezerse sira-nia direitu. Rekomendasaun husi PLP mak ne’e, atu iha kolaborasaun buka solusaun,” Alfredo hateten.
Iha enkontru hanesan, Sekretáriu Profisionál Partidu FRETILIN Munisípiu Baucau, Jeremias Magalhães, mós manifesta preokupasaun kona-ba polítika Governu nian, tanba prosesu atualizasaun kartaun eleitorál semi-biométriku ba biométriku iha Munisípiu Baucau seidauk atinji 100%.
Jeremias hateten katak, bazeia ba dadus STAE, sei iha eleitores barak ne’ebé seidauk atualiza sira-nia kartaun, maibé oinsá Governu atu rezolve obstákulu sira ne’e.
Nia mós konsidera katak, menus ekipamentu no rekursu umanu iha Servisu Rejistu no Notariadu Munisipál Baucau sai nu’udar obstákulu ida ne’ebé difikulta prosesu atualizasaun kartaun eleitorál ba biométriku.
Tanba ne’e, nia dezafia autoridade kompetente sira atu buka solusaun efetiva, hodi garante katak to’o fulan Janeiru 2027, prosesu atualizasaun kartaun eleitorál biométriku bele atinji 100%.
“Ba ami husi FRETILIN, buat ne’ebé ami aprezenta iha ne’e mak katak povu atu ba fatin ne’ebé hala’o atualizasaun kartaun eleitorál ne’e iha difikuldade, tanba ita-nia populasaun 80% ba leten hela iha área rurál,” Jeremias hateten.
Nia mós hato’o katak Governu tenke komprende razaun sira ne’ebé halo komunidade la konsege atualiza sira-nia kartaun eleitorál, inklui distánsia no prosedimentu administrativu ne’ebé sai preojudika ba komunidade sira.
“Ita tenke hatene tanba sá ita-nia populasaun sira la mai atualiza. Sira iha dúvida hanesan ne’e: se kartaun biométriku ne’e kontinua uza iha nivel suku no aldeia, tanba sá agora tenke uza dokumentu hotu-hotu? Tanba uluk halo mós uza dokumentu. Nusa agora la bele aprezenta an de’it, maibé tenke uza dokumentu tan,” nia haktuir komunidade nia preokupasaun.
(tom)
