BAUKAU, STLTIMORLESTE.com – Tuir dadus husi Estatistika Nasional ema rihun 12.511 iha Timor Leste (TL) enfrenta defisiensia tilun.
Diretora Ezekutiva Klibur Defisiensia Tilun Timor-Leste, Crecensia Madeira de Deus hateten, KDT-TL nuudar organizasaun naun governamentais neebe halao nia knaar foka liu ba tipu Defisiensia tilun nian iha TL liu husi promove no advoka partisipasaun Ema ho Difisiensia tilun sira nian iha prosesu dezenvolvimentu nasional, maibe seidauk bele kobre, tanba too ohin loron KDT-TL seidauk kobre atendimentu ba Ema ho Defisiensia tilun sira hotu.
“Husi rezultadu Sensus 2015 hatudu katak numeru Ema ho Defisiensia tilun iha Timor-Leste 12.511 no numeru ida neebe signifikativu boot tebes, husi numeru nee ami nia atendimentu seidauk too,” informa Crecensia iha Vila Antiga, Buakau, Tersa (23/09/2025).
Nia esplika, KDT-TL nia vizaun katak Ema ho Defisiensia tilun hotu iha direitu ba protesaun no partisipasaun no inkluzaun sosial ba moris diak liu husi programa hakbiit no promove ba partisipa iha atividade ekonomia, sosial, edukasaun, arte, saude no desportu, maibe barak seidauk asesu atividade refere.
Tanba nee KDT-TL sei haforsa advokasia no rede servisu protesaun sosial, asesibilidade no edukasaun ba Ema ho Defisiensia tilun iha nivel Munispiu, Nasional no Internasional neebe daudaun KDT-TL fasilita formasaun lian jestual ba Ema ho Defisiensia tilun sira hodi sai tradutor iha eventu importante sira.
Nia informa, husi numeru 12.511 KDT-TL foin rejistu deit Ema ho Defisiensia tilun nain 117 kompostu Dili nain 110 no nain 7 seluk husi Munisipiu Ermera neebe balun asesu ona iha universidade no Ensinu Rekorente.
“Husi membru 117 nee nain 5 asesu iha Universidade UNTL agora daudaun nain 4 iha faze hakerek monografia inklui hau rasik no nain ida mak sei estuda hela, nain 44 asesu Ensinu Rekorente nain 33 remata ona 10 resin sei iha faze aprende,” Crecensia akresenta.
Diretora Ezekutiva KDT-TL nee husu ba Governu, atu tau konsiderasaun ba lian jestual iha nivel formasaun no husu komunidade inan aman sira bainhira iha oan Defisiensia tilun lori sira ba edifisiu KDT-TL.
Reprezentante Diretor Ezekutivu Asosiasaun Difisiensia Timor-Leste, Vitorina Sarmento Sávio hateten, mezmu kondisaun mak Ema ho Defisiensia tilun no Defisiensia seluk tan, maibe sira mos iha talentu no mehi.
“Sira mos iha direitu atu asesu ba Edukasaun nomos setor hotu hotu, maske ema hotu seidauk hatene diak maluk hirak nee, maibe atu hateten deit katak maluk hirak nee ativu tebes iha kreativu oi-oin,” Vitorina katak.
Nia husu Autoridade relevante sira atu tau atensaun nafatin ba organizasaun naun governamentais sira neebe daudaun tau matan ba Ema ho Defisiensia sira, nunee bele eleva mos maluk Defisiensia sira nia konhesimentu hodi kompleta malu iha prosesu dezenvolvimentu.
Jornalista: Tomas Reis
Editora: Carme Ximenes
