BAUKAU, STLTIMORLESTE.com – Tekniku destakadu husi Ministeriu Obras Publikas (MOP) iha Munisipiu Baukau rekonhese projetu reabilita estrada husi Suku Afasa ba area Darenafa, Suku Namanei, Postu Administrativu Kelikai Antigu, Munisipiu Baukau, laiha Kualidade.
Projetu reabilita estrada husi Suku Afasa ba too baliza area Darenafa Suku Namanei hamutuk kilometru 3 neebe responsabiliza husi kompanhia lokal Flores Unipeoal,Lda ho tipu reabilita cor ho sementi, maibe laiha kualidade, tanba hahu rahun no nakfera.
Hafoin komunidade no Autoridade Suku Afasa Joaquim Fernandes Ximenes kestiona asuntu nee, mak iha loron 09 Setembru 2025 ekipa tekniku husi Obras Publikas Destakadu iha Munisipiu Baukau too kedas fatin projetu, hodi observa direita no koordena ho Autoridade Postu hodi haree kestaun nee, tanba projetu laiha kualidade.
“Fator kualidade nee iha terenu barak mak memang la dun diak, maibe fator kualidade nee laos kontribui deit mai husi material, maibe kontribui barak liu nee mai husi sosial, katak trabalhador sira neebe servisu iha neeba nee tekniku kompanhia sira labele orienta sira,” hateten Koordenador Tekniku Obras Publikas Destakadu Munisipiu Baukau Diego Cipriano Caleza ba STL iha knaar fatin Vila Nova, Baukau, Tersa (23/09/2025).
Koordenador nee informa, projetu estrada nee daudaun atinje ona 70.83% no foin fo pagamentu ba 54.83% nian, tanba projetu estrada iha parte balu laiha kualidade.
Maibe liu husi enkontru ho Autoridade Postu sei koordena ho parte kompanhia atu halo hikas manutensaun ba estrada hirak neebe nakfera ona nunee bele fo pagamentu ba 70%, bainhira parte kompanhia la halo manutensaun pagamentu sei too deit iha 54%, tanba regras.
“Signifika katak balu neebe progresu iha duni maibe la kualidade ita labele rekomenda ba pagamentu, tanba iha balun ita labele rekomenda ba pagamentu, entaun hakarak ga lakohi buat sira nee sita hotu iha kontratu, se la kumpri dever labele ezije direitu,” katak Caleza.
Koordenador nee akresenta, projetu estrada refere iha parte balun laiha kualidade parte ida deskonfia husi falta atensaun husi kompanhia kona-ba antisipa udan bee, tanba servisu hotu la taka ho diak nunee sementi forsa tun.
Maibe garante parte kompanhia sei responsabiliza ba asuntu refere liu husi halo manutensaun nunee bele aprova pedidu ba pagamentu 70.83% nian no garante kompanhia sei kontinua servisu, tanba daudaun iha terenu.
Entretantu kompanhia Flores Unipeoal Lda neebe Governu liu husi Ministeriu Obras Publikas, kontratu hodi implementa projetu refere ho valor orsamentu US$ 510,231.96.
Jornalista: Tomas Reis
Editora: Carme Ximenes
