DILI, STLTIMORLESTE.com – Lei neebe mak aprova iha Parlamentu Nasional (PN) sei vale ba iha futuru.
Tuir Eis Deputadu Manuel Tilman katak, estudante sira hakarak halakon buat tolu kona-ba sosa kareta, lei pensaun vitalisia no lei manifestasaun nian, kona-ba lei manifestasaun atu garante estabilidade nasaun nian, se muda fali, Parlamentu Nasional poder laiha.
Tuir nia, kona-ba pensaun vitalisia tenke haree kona-ba deputadu nain 65 hakarak kareta sira nee, no buat ida seluk deputadu sira asembleia konstituiente neebe iha direitu adkeridus nee mak iha pensaun vitalisia nee.
“Lei neebe sira aprova agora vale ba futuru laos aplika fali ba pasadu, nee duni sira aprova karik lei pensaun vitalisia foun agora aplika ba deputadu 65 nee no ba oin laos ba kotuk,” dehan Manuel Tilman ba jornalista STL iha nia knaar fatin, Tersa nee (23/09/2025).
Nia sublina, lei sei aplika ba kotuk mak viola direitu fundamentais no direitu adkiridus, no ida seluk lei nee la iha retroativu, Governu konstituisaun nee aplika ba futuru.
Iha fatin ketak, Akademiku Universidade Nasional Timor Lorosae (UNTL), Rafael de Jesus dehan, PN tenke tetu didiak kona-ba lei pensaun vitalisia, tanba mosu preokupasaun iha sosiedade nia leet.
“Hau hanoin sira tur iha neeba reprezenta povu, tanba nee ita fiar katak sira sei foti desizaun ida nee tuir povu nia hakarak,” dehan nia.
Akademiku nee husu atu deputadu sira hatudu ezemplu neebe diak ba iha sosiedade sira, tanba ohin loron sosiedade barak mak sei moris terus, liu-liu liga ba iha infraestrutura sira. Tanba nee se osan iha tau atensaun ba problema neebe komunidade hasoru, labele benefisia ba aan deit.
Jornalista: Terezinha De Deus
Editora: Domingas Gomes
One Response
Uluk nanain apreseia tebes media STL tanba bele lori ona notísia ida. Felizmente notísia ida ne’e mós dada públiku nia atensaun, maibé buat ne’ebé ha’u hakarak dehan iha ne’e no atu hatene didi’ak mak kona-ba tópiku no konteudu notísia refere. Iha tópiku hakerek nune’e: “Lei neebe mak aprova iha Parlamentu Nasional sei vale ba iha futuru”, no iha konteudu: “Lei neebe sira aprova agora vale ba futuru laos aplika fali ba pasadu, nee duni sira aprova karik lei pensaun vitalisia foun agora aplika ba Deputadu 65 nee no ba oin laos ba kotuk,” dehan Manuel Tilman ba STL, Tersa (23/09/2025).
Husi tópiku no konteudu ne’e rasik halo ona dilema boot. Ema sira ne’ebé lee de’it tópiku sei inteperta oin seluk no sira ne’ebé lee hotu notísia ne’e sei haree oin seluk.
Ha’u-nia pergunta mak ne’e:
1. Tópiku notísia refere apresenta duni objektivu husi Dr. Tilman nian ka la’e?
2. Notísia ne’e rasik hakarak koalia saida ba públiku? (Tanba notisia ne’e rasik la esplika klaru kona-ba Dr. Tilman nia objektivu).