OEKUSI, STLTIMORLESTE.com – Governu liu husi Instituisaun Nasional Kombate HIV-SIDA (INSCIDA) halao sensibilizasaun kona-ba virus HIV ho tema “Mai Ita Hamutuk Proteje TL Husi Problema Transmisaun Virus HIV” ba komunidade sira iha Suku Bobocasse, Rejiaun Administrative Espesial Oekusi-Ambeno, Sub-Rejiaun Pante Macassar.
Prezidente INCSIDA, Daniel Marcal dehan, Sensibilizasaun ohin iha Suku Bobocasse maioria ferik no katuas maka tuir, maibe INCSIDA kontinua fahe informasaun atu nunee inan-aman sira bele hatutan fila-fali informasaun sira nee ba oan sira, atu prevene moras HIV-SIDA, tanba moras nee aimoruk laiha atu kura.
“Ita mai halo sensibilizasaun hanesan ba komunidade sira, mais ita haree joven sira oituan deit. Tuir sensibilizasaun nee ferik katuas sira maka barak, maibe seksu livre barak liu akontese ba iha joven sira, maibe sira la mai teste ran, nee oinsa sira bele hatene sira nia status HIV,” dehan nia ba jornalista sira Suku Bobocasse, Regiaun Administrativu Especial Oekusi-Ambeno, Sub-Rejiaun Pante Macassar, Tersa (23/09/2025).
Nia esplika, kazu HIV sae makaas ba 2,400, nee maioria joven sira. Joven feto ho mane kuandu moris hamutuk laiha responsabilidade.
“Dadus neebe iha 26% husi ita nia joventude nee ho idade 16 too 27 mak kona HIV 26%,”nia deklara.
Iha fatin hanesan Xefe Suku Bobocasse, Tomas Nessi informa, ohin loron nee importante tebes ba Komunidade Suku Bobocasse, tanba INCSIDA mai halo sosializasaun kona-ba moras HIV-SIDA nian.
“Moras ida nee pregozu tebes ba ita nia moris, tanba nee hau husu inan-aman sira tenke rona. Durante nee ami iha esperansa boot para INCSIDA mai halo sosializasaun iha nee, no hau hakarak INCSIDA mai fahe informasaun ba hau nia komunidade sira konaba moras neebe agora dadaun ita infrenta. Ita rona informasaun nee fila-fali ba uma fahe hatutan ba ita nia malu sira neebe la marka prezensa iha nee,” nia dehan.
Entertantu Suku Bobocasse, Regiaun Administrative Especial Oekusi-Ambeno, Sub-Rejiaun Pante Macassar neebe iha Aldeia 4, uma kain hamutuk 815 no total populasaun hamutuk 3408.
Jornalista: Jeniche da Costa
Editora: Domingas Gomes
