DILI, STLTIMORLESTE.com – Primeiru Ministru Malazia, Dato Seri Anwar Ibrahim vizita Timor Leste (TL) atu reafirma forte ba amizade entre nasaun rua.
Iha loron Tersa (23/09/2025) Prezidente Republika, Jose Ramos Horta simu vizita ofisial Primeiru Ministru Malazia, Honorável Dato’ Seri Anwar Ibrahim, mai Timor Leste.
Primeiru Ministru halao vizita ofisial loron rua iha Timor Leste, entre loron 23-24 Setembru, ho konvite husi ninia omologu Prezidente Timor Leste, Jose Ramos horta no Primeiru Ministru Timor Leste, Kay Rala Xanana Gusmão.
Vizita ofisial ida nee ho objetivu atu troka hanoin kona-ba preparasaun adezaun formal Timor Leste nian ba ASEAN neebe sei realiza iha loron 26 Outubru, iha Kuala Lumpur, nunee mos atu hametin relasaun bilateral no kooperasaun ekonomika, sosial no kultural entre nasaun rua nee.
Iha tinan 2003, Primeiru Ministru Mohamad Mahathir halao vizita ofisial ida mai Timor Leste antes remata ninia mandatu, bainhira Malazia partisipa iha operasaun pas nian liu husi Nasoins Unidas, iha neebe polísia liu 200 Malazia nian servisu iha kapasidade oin-oin iha UNPOL no FPU.
Durante vizita ofisial nee mos asina Akordu Ekonomiku, Tekniku, Sientifiku no Kultural neebe reflete importansia no kompromisu forte neebe nasaun rua nee iha atu hametin sira nia relasaun bilateral.
Aleinde nee Malazia fo doasaun ba F-FDTL kamiaun militar 32, armas no munisaun. Hanesan sinal amizade nian, Timor Leste fo ba Malazia rai bloku ida ba futuru konstrusaun Embaixada Malazia nian iha Dili.
Prezidente Ramos Horta simu Primeiru Ministru Dato Seri Anwar Ibrahim, ba enkontru Kortezia iha Palasiu Prezidensial Nicolau Lobato. Prezidente halao serimonia simu hanesan tuir protokolu ba Xefe Estadu, inklui tiru salva.
“Hau haksolok tebes mak hau hatoo benvindu ba hau nia belun diak, Primeiru Ministru Dato’ Seri Anwar Ibrahim mai Timor Leste. Ninia vizita hanesan reafirmasaun forte ida ba amizade profunda no duradoura entre ita nia nasaun rua ligasaun ida neebe harii iha solidariedade no manten ho valor sira neebe ita fahe,” hateten Prezidente José Ramos Horta.
Xefe Estadu hatete, Timor nia relasaun nee iha kompromisu komun ba demokrasia, justisa no respeitu mutuu. Apoia firmi Malazia nian nee instrumental durante momentu krítiku sira iha istoria iha períodu antes restorasaun Timor independensia, durante krize polítika 2006, no nia advokasia la para ba Timor Leste nia membru ASEAN.
Prezidente Ramos Horta halao enkontru bilateral ho Primeiru Ministru Dato’ Seri Anwar Ibrahim, reafirma amizade kmanek entre Timor-m Leste no Malazia no sira nia kompromisu ba Ázia Sudeste ida neebe pas no prosperu.
Enkuantu Timor Leste prepara aan atu sai membru ASEAN ba da-11 iha Cimeira ASEAN ba da-47 iha Outubru 2025, parte rua sei kontinua koordenasaun besik ho ASEAN hodi atinje roteiru sira seluk neebe falta iha roadmap. Area Xave sira Kooperasaun nian neebe deskute Adezaun ASEAN Timor Leste sei kontinua kordenasaun besik ho Malazia no ASEAN atu kompleta roteiru sira seluk neebe falta iha roadmap atu sai membru tomak antes adezaun neebe planeia ona iha Simeira ASEAN iha fulan Outubru tinan 2025.
Komersiu no investimentu parte rua nee simu ho laran haksolok interese Malazia nian iha ekonomia Timor Leste nian no konkorda atu fasilita investimentu neebe fo benefísiu ba malu, liu-liu iha agronegosiu, turizmu, servisu dijital no enerjia renovavel.
Edukasaun no abilidade lider sira kompromete atu habelar oportunidade ba estudante no ofisial Timoroan sira atu hetan benefísiu husi formasaun tekniku no profisional, bolsa estudu no interkámbiu ho instituisaun Malazia sira.
Konetividade no fasilidade halo negosiu nasaun rua nee sei servisu atu hadia liu tan konetividade aéreu no marítima, fasilitasaun komersiu, no parseria hodi hametin ligasaun entra povu no komersiu.
Iha loron ikus vizita nian, Primeiru Ministru Dato’ Seri Anwar Ibrahim mos sei hatoo diskursu prinsipal Palestra Prezidensiál 2025 Série IV, iha loron 24 Setembru 2025, ho títulu “ASEAN no Papél Timor-Leste nian.”
Prezidente Ramos Horta sei kondekora Primeiru Ministru Dato’ Seri Anwar Ibrahim ho Grande Colar da Ordem de Timor Leste, nuudar rekonhesimentu ba ninia amizade kleur ona ho Timor Leste no mos apoiu ba dezenvolvimentu nasional no integrasaun rejional nian.
Timor Leste no Malazia sai parseiru kleur ona, Timor Leste hateke ba oin atu kontinua harii futuru ida ho oportunidade sira neebe partila hamutuk iha família ASEAN nian laran.
Jornalista: Emerenciana Pinto
Editor: Xisto Mendonça
