AMBENO, STLTIMORLESTE.com – Komunidade Aldeia Oebaha, Suku Bobometo, Postu Administrativu Oesilo, Rejiaun Administrativa Espesial Oecusse-Ambeno (RAEOA), iha tempu bailoron preokupa ho bee moos, tanba iha bee posu ida iha sira nia foho hun ho naruk 10 metrus, kada loron komunidade hobur bee nee no kuru bee ho sistema manual dada ho balde.
Preokupasaun nee hatoo husi Xefe Aldeia Oebaha, Marselino Ole ba STL iha ambitu lansamentu Grupo Kooperativa habokur karau iha Aldeia Oebaha, Suku Bobometo, Postu Administrativu Oesilo, RAEOA, Kuarta (24/09/2025).
“Ami iha Aldeia Oebaha, kada tinan iha tempu bailoron ona hanesan nee, sempre preokupa ho bee moos, ami nia bee posu antigu iha foho hun Oebaha ho nia naruk kuaze 10 metrus liu, kada tinan ami komunidade Oebaha, sempre ba hobur bee posu nee no kuru ho manual, uza balde maka dada sae bee ba ami nia balde, foin maka lori ba uma. Ami husu ba governu atu tau matan ba ami nia preokupasaun nee, sei bele dada sai bee posu tuan nee ho makina, nunee mos halo perfurasaun bee atu nunee komunidade sira bele utiliza ba sira nia konsumu bee moos, tanba iha fatin ida nee, kada tinan sempre araska iha tempu bailoron,” dehan nia.
Iha oportunidade seluk, Francisco Bobo nuudar komundade Oebaha, konfesa katak, iha sira nia aldeia Oebaha, kada tinan sempre hasoru dezafiu boot maka bee mos, neebe husu ba ukun nain sira atu tau matan ba preokupasaun nee.
“Ami nia produtu industria hanesan tua mutin, tua sabu no animal maibe tempu bailoron ona hanesan nee tua mutin ho tua sabu kontinua fo rendementu liu husi prosesamentu koa tua, maibe kona ba bee moos maka araska ba ema nomos animal. Ohin ita lansa ona kooperativa habokur karau, ida nee hanesan oportunidade diak ida, atu estadu tau matan ba bee moos, liu husi meus fura bee iha rai okos tanba haree ba insfraestrutura Estrada komesa lao ona, no harii ona ami nia ponte iha Paut, maibe bee moos maka araska,” dehan nia.
Responde kona ba asuntu nee, PA-RAEOA, Regio da Cruz Salu dehan, governu iha obrigasaun atu haree povu ninia difikuldade, tanba nee ba oin, tenke dada bee moos ba povu atu uza ba konsumu nomos fo hemu animal sira.
“Ami nuudar servidor povu, tenke dada bee moos ba komunidade, tanba nee maka ekipa tekniku sira sei tuun iha baze hodi identifika preokupasaun povu nian hodi responde,” dehan nia.
Nia haktuir tan katak, maske sira nia knaar fulan 3 deit maibe hanesan autoridade tuteladu neebe maka Xefia husi Primeiru Ministru, Kay Rala Xanana Gusmao, neebe oriente atu tau matan ba povu nia moris iha area rurais, neebe funsionariu publiku ho diretor rejional sira ho autoridade RAEOA, tenke tun iha baze, kada fulan 60% halao serbisu iha komunidade nia leet no 40% maka serbisu iha instituisaun publiku kona ba serbisu administrasaun.
Jornalista: Joseph Koa
Editor: Joseph Koa
