DILI, STLTIMORLESTE.com – Programa husi Prezidente Republika, Jose Ramos Horta ho Prezidente Horta Show simu lider sira husi industria sinema mundial.
Iha loron dimingu (28/09/2025) loron ida neebe nakonu ho inspirasaun iha Palasiu Prezidensial Nicolau Lobato, ba gravasaun espesial ida husi programa “Prezidente Horta Show”.
Prezidente Republika, Jose Ramos Horta, dirije episodiu istoriku ida neebe aprezenta delegasaun internasional ida ho naran-boot, iha parseria ho Dili International Film Festival.
Painelista sira neebe notavel inklui Lena Lenzen, Diretora Dili International Film Festival nian Diretor husi Darwin International Film Festival ator famozu ida husi Malazia no diretor no produtor filme prominente sira husi Japaun, Koreia no Tailandia.
Konversasaun nee esplora oportunidade sira ba kolaborasaun internasional, fahe esperiensia no konesimentu, no trasa futuru ida neebe vibrante ba industria sinema Timor-Leste nian iha palku mundial.
Hafoin diskusaun neebe klean, selebrasaun sinema nian kontinua ho projesaun eskluziva filme ida nian neebe dubla ho furak tebes ba lian Tetum husi artista Timoroan sira rasik.
Eventu ida nee sublina Prezidensia nia kompromisu hodi apoia arte no kultura nasional, enkuantu harii mos ponte ho komunidade kriativa internasional.
Jornalista: Emerenciana Pinto
Editora: Carme Ximenes
