BAUKAU, STLTIMORLESTE.com – Governu liu husi Ministeriu Administrasaun Estatal (MAE) introdus matadalan kompetisaun suku ba Autoridade Munisipiu Baukau.
Koordenador Juri Nasional atual Diretor Jeral Dezentralizasaun no Governu Lokal, António Augusto Guterres esplika, kompetisaun suku refere realiza bazeia ba lei numeru 09/2016 artigu 06 no 23 neebe atribui ona kompetensia ba kada suku iha territoriu nasional, nunee Nonu Governu Konstitusional implementa hahu husi sosializasaun iha nivel Munisipiu molok implementa.
Kriteria prinsipal ba kompetisaun refere mak hanesan Servisu Administrasaun Suku nian neebe kompostu husu Xefe Suku, Konselhu Suku inklui funsionariu Suku nain 4 nian kontrolamentu asuntu edukasaun, saude, seguransa alimentar inklui ambiente liu-liu priensementu livru 18, sistema integradu Aldeia nian ba portal Munisipal nomos ba Balkaun Uniku.
“Agora objetivu kompetisaun atu avalia prosesu dezenvolvimentu neebe implementa husi Governu Sentral iha Suku laos deit ba PNDS no PDIM, mais projetu balun neebe direita mai husi linha ministeriais neebe ba liu iha Aldeia no Suku nia benefisiu direita ba povu nee too iha neebe,” António hateten hafoin abertura atividade intrudusaun iha salaun Sentru Konvensoens, Vila Antiga, Buakau, Segunda (29/09/2025).
Objetivu husi kompetisaun nee tuir nia atu enkoraja Autoridade Suku sira no promove, nuudar save importante Governu nian iha baze kontribui ba iha prosesu dezenvolvimentu.
“Nia premiu nee ita labele fo sai, maibe iha sertifikadu no osan, primeiru klasifikasaun sei ba nasional, klasifikasaun rua no tolu nee iha nivel autoridade nian pois kuandu iha selebrasaun 28 Novembru mak Ministeriu sei pronunsia distribuisaun premiu too iha nivel Postu,” António katak.
Koordenador Juri Nasional nee komenta, bainhira identifika suku neebe priense kriteria ba klasifikasaun dahuluk iha kompetisaun refere sei simu premiu iha Nasional enkuantu klasifikadu seluk sei distribuisaun premiu iha nivel Postu Administrativu bainhira selebrasaun loron 28 Novembru tinan nee remata.
Iha fatin hanesan reprezentante Prezidente Autoridade Munisipiu Baukau atual Sekretariu Munisipal Baukau Asuntu Administrasaun no Finansas, Juvinal Daniel Filipe Belo hateten, kompetisaun nee objetivu atu motiva Autoridade Suku sira kona-ba livru 18 no atu, hatene Autoridade Suku sira nia kapasidade ba jestaun servisu Suku nian.
Tanba nee molok hakat ba faze kompetisaun hahu husi faze sosializasaun nunee ekipa juri husi nivel Postu Administrativu, Munisipiu no Nasional bele lao tuir matadalan neebe estabelese ona.
“Agora ita hotu hatene Baukau iha Suku 62 kriteria livru 18 nee mak esensial atu haree iha neeba Administrasaun Suku, neebe durante nee lao ona esensial ida tan mak Administrasaun Suku no Jestaun Suku, nunee meus ida nee bele motiva Suku sira karik durante nee balun priense ou la priense livru sira nee bele hakas aan hadia Administrasaun iha Suku,” Junival katak.
Juvinal komenta, Autoridade Munisipiu kontinua enkoraja Autoridade Suku sira atu kontinua halao servisu Administrasaun Suku nian, laos kestaun kompetisaun, maibe tuir dekretu lei neebe estabelese ona Autoridade Suku tenke kumpri regras hodi fo prestasaun servisu ba komunidade sira.
Entretantu sosielizasaun nee realiza iha Salaun Sentru Konvensoens Vila Antiga Buakau hetan partisipasaun masimu husi Autoridade Postu no diretores no kargu xefia sira iha Munisipiu Baukau, maibe Autoridade Suku iha Munisipiu Baukau la marka prezensa, tanba la hetan informasaun husi sosializasaun nee.
Jornalista: Tomas Reis
Editora: Carme Ximenes
