BAUKAU, STLTIMORLESTE.com – Suku foun neebe foin lalais estabelese iha Munisipiu Baukau fulan 9 ona seidauk hetan insentivu. Suku foun tolu mak hanesan Builai no Kaibada Makasae, pertense ba Postu Administrativu Baukau Vila inklui Werumata pertense ba Postu Administrativu Laga.
“Husi tomada pose fulan Abril too agora nee ami seidauk hetan, nee ami suku foun 3 nee hotu,” hateten Xefe Suku Werumata, Sabino Martins ba STL, iha Werumata, Segunda (29/09/2025).
Tuir lideransa komunitariu nee katak, osan insentivu neebe durante suku foun 3 inklui Suku Werumata la hetan fo impaktu tebes ba Servisu Suku, tanba labele atende ezijensia komunidade sira nian ho diak.
Iha sorin seluk, Diretor Jeral Dezentralizasaun no Governu Lokal, António Augusto Guterres hateten, relasiona Suku foun 3 neebe too ohin loron seidauk hetan insentivu nee problema Autoridade Munisipiu Baukau nian, tanba nee husu atu solusiona hodi la fo impaktu ba prosesu Administrasaun iha Suku 3 refere.
“Semana kotuk hau ba iha Builai iha neeba kestiona kona-ba 9 mezes sira la hetan fundus, maibe nee bele komfirma ho Prezidente Autoridade Sekretariu Asuntu Administrasaun Finansas, tanba estabelese Suku nee bazeia ba proposta despois eleisaun lao tuir protidaun husi Autoridade,” katak António .
Hatan ba kestuan nee Sekretariu Munisipal Baukau Asuntu Administrasaun no Finansas, Juvinal Daniel Filipe Belo rekonhese, Suku foun 3 nee Autoridade Munisipiu Baukau seidauk atribui insentivu, tanba Suku 3 foun refere seidauk iha funsionariu Suku, maibe daudaun prosesu rekrutamentu finaliza ona no hein rezultadu final.
“Tuir lo-loos nee antes nee indika Xefe Aldeia ida sai hanesan tejoreiru hanesan anterior, maibe durante nee laiha komunikasaun finansas ho suku entaun pagamentu tarde, maibe semana ida nee halo ona pagamentu ba ida nee,” Juvinal katak.
Nia hatutan, lo-loos antes fo pose ba estrutura Suku foun 3 nee indika Xefe Aldeia ida sai hanesan tejoreiru nunee bele foti osan insentivu suku nian iha Administrasaun Autoridade Munisipiu, maibe durante nee la akontese, nunee Autoridade la atribui insentivu, maibe daudaun bele prosesa ona, iha funsionariu 4 nain 4 ba kada Suku neebe rekruta foin lalais nee.
Jornalista: Tomas Reis
Editora: Carme Ximenes
