DILI, STLTIMORLESTE.com – Diretor Jeral Prevensaun no Sensibilizasaun, Antonino Alves da Cruz hatete, Lei neebe iha hateten katak, se mak remata ona nia funsaun, maibe kontinua atualiza nia rendimentu durante tinan 3.
“Lei hateten banhira sesa nia mandatu iha prazu loron 30 atu atualiza fali nia rendimentu bens no interese, maibe la hotu iha nee deit, “hatete Antonino ba jornalista sira, iha Kaikoli, Dili, Kuarta (08/10/2025).
Nia hatutan, durante tinan 3 kontinua atualiza nafatin nia rendimentu, no tinan tolu liu ona maka foin la deklara rikusoin.
Bainhira simu fali kargu foun kontinua deklara nafatin, nee lei maka hateten husi kargu xefia sira tun too iha nia seksaun, hotu hotu obrigatoriumente tenke deklara, no mos funsionariu sira efeitu sira neebe servisu iha area aprovezionamentu fiskalizasaun, sira neebe koa reseitas ba estadu, tenke presta sira nia deklarasaun no tinan tolu dala ida ba sira neebe funsionariu, no kargu xefi kada tinan.
No aprezenta nee hahu husi loron ida fulan Janeiru too iha loron 31 fulan Janeiru, kuandu liu husi nee la ba aprezenta sira nia deklarasaun sei aplika koima maka 25 porsentu.
Maibe tinan 2025 nian remata ona, maibe sira neebe simu kargu foun prazu loron 30 ba sira, kuandu simu knar tenke ba atualiza liu husi prazu nee sei aplika koima.
Ho nunee deklara rikusoin maka hanesan bens no moves rai no uma, bens sira neebe hanesan bele movel no book an karreta no motor, no rendimentu neebe mai husi salariu, renumerasaun, negosiu, neebe pertense ba ninian inklui mos nia familia fen no oan nia rendimentu neebe sei dependensia hela ba deklarante deklara.
Nunee deklara mos kona-ba osan mean ka osan mutin, uma balu iha rai liur, inklui konta husi fen no oan nian, ho prezente neebe simu no kompania neebe entrega ba ema seluk maka hanesan Direktor tenke deklara.
Iha fatin ketak, Akademiku UNTL, Sebastião dos Santos dehan, entidade sira neebe hetan konfiansa, tenke hakruk ba regra neebe iha.
“Importante entidade sira neebe hetan konfiansa, kuandu termina sira nia mandatu tenke hakruk nafatin ba regra neebe iha,” dehan nia.
Nia dehan, KAK nia funsaun importante tebes atu kontrola entidade sira hanesan nee, hodi mosu buat ruma fasil atu deskobre konaba sira nia rendimentu.
Jornalista: Terezinha De Deus
Editora: Carme Ximenes
