DILI, STLTIMORLESTE.com – RYLA Timor Leste realiza konferensia nasional, hodi prepara joventude sira sai lideransa neebe diak iha futuru.
Diretor RYLA TL, Octavio da Silva Monteiro hatete, atividade nee importante tebes iha programa RYLA nian, babain bolu konferensia Nasional.
“Atividade nee importante tebes babain bolu konferensia nasional ba joventude sira liu liu halibur joventude sira iha teritoriu Timor laran tomak atu bele aprende hamutuk durante semana ida iha akampamentu, no lori familia boot RYLA-TL nia naran hatoo ba nain Prezidente Republik bele fasilita hela fatin ba ami hodi halo lansamentu ofisial, ida nee hanesan premeira vez ba ami sente ida nee preveileizu boot ida,” dehan Octavio ba jornalista sira, iha Palasiu Prezidensial, Nocolau Lobato, Bairru Pite, Dili, Segunda (13/10/2025).
Nia mos hatoo agradese ba Prezidente Republika, Jose Ramos Horta neebe oferese fatin hodi halo lansamentu konferensia nasional iha Palasiu Prezidensial, no agradese mos ba Primeiru Ministru, Kay Rala Xanana Gusmão ba apoiu tomak bele realiza eventu nee.
“Ami sente kontente bele mai iha nee, halo diskusaun direitamente ho lideransa nasional oinsa mak bele prepara futuru lideransa joven sira atu bele lao ba oin, no atividade ida nee realiza hetan apoiu mos husi pertaminan internasional Asia Foundation, Uniaun Europeia, inklui mos halibur ajudu finanseiru husi alumi RYLA-TL hotu husi 2010-2024 bele kontribui atividade bele realiza iha 2025,” katak nia.
Nunee mos Asesor Prezidensia Republika, Virgilio Babo hatoo agradese ba joventude sira neebe iha inisiativa husi RYLA-TL.
Ryla- Tl organizasaun joventude ida neebe ejiste iha Timor Leste tempu kleur ona, no hanesan ita boot sira hatene katak Prezidente Republika, Jose Ramos Horta sempre partisipa sira nia eventu iha neeba deit, signifika katak Prezidente tau konsiderasaun boot ba joventude sira liu liu iha area formasaun, hanesan ohin hau sita ona Prezidente nia liafuan ba joventude sira mak estuda no estuda,” dehan Asesor.
Asesor nee hatete, Prezidente Republika sempre fo hanoin ba joven sira katak, estuda tanba ho estuda mak bele kontinua hatutan buat neebe jerasaun tua husik hela ba jerasaun foun sira.
Entretantu Ministru Joventude Desportu Arte No Kultura, Nelio Isac Sarmentu Organizasaun RYLA-TL hanesan organizasaun ida neebe halibur joventude sira neebe mai ho voluntariu, laos mai para hetan buat ruma, maibe ho voluntariu hamutuk aprende konaba koinesementu ba preparasaun iha sira nia vida humana sira nia aan.
Nia dehan, tinan tinan RYLa-TL sempre halo atividade, no tinan ida nee sira kontinua halo atividade nomos ho prezensa membru foun, ida nee oportunidade ba joven sira hotu neebe ladun hetan koinesementu iha edukasaun formal entau husi RYLA sira bele aprende buat barak iha nee.
Jornalista: Emerenciana Pinto
Editora: Carme Ximenes
