DILI, STLTIMORLESTE.com – Portavoz Angelina Maria Castela da Cruz hateten, universidade fatin ba aprende, laos sai fali fatin prostituisaun hodi hakonu ho nesesidade sexual.
Lia hirak nee hatoo husi portavoz Angelina Maria Castela da Cruz ba jornalista sira, hafoin realiza konferensia imprensa husi Faculdade Siensia Sociais no Faculdade Medicina Siensia da Saude, hodi kontra predator sexual iha kampus Kaikoli, Segunda (13/10/2025).
“Universidade fatin ba aprende, laos fatin ba prostituisaun hodi hakonu nesesidade sexual no laiha toleransia ba asediu seksual iha universidade,” tenik portavoz.
Nunee nia mos husu ba Magnifiku Reitor no Prezidente Konselhu Disiplinar atu fo sai rezultadu desizaun husi Konselhu Disiplinar nian liu husi relatoriu no akta final kona-ba kazu asediu seksual neebe akontese iha FMCS, tanba ate a data seidauk iha resposta signifikativa.
“Husu ba Magnifiku Reitor no Prezidente Konselhu Disiplinar aplika mos sansaun disiplinar ba diretor departamentu parteira neebe komete abuzu de poder liu husi fö suspensaun ilegal ba estudante nain tolu sein konsulta ho Konselhu Disiplinar,” dehan nia.
Universidade Nasional Timor Lorosa’e, Fakuldade Siensia Sosiais (FCS), Departamentu Politikas Piblikas (DPP) no Fakuldade Medisina no Siensia Saude (FMCS), estudante feto sira hetan asediu sexual husi dosente, neebe hatun sira nia dignidade no la sente seguru iha prosesu aprendizajen no balun lakon nia estudu.
“Husu ba estrutura universidade atu aplika sansaun disiplinar neebe todan ba predator sexual iha FCS no DPP, no husu ba universidade atu enkamina kazu asediu sexual iha FCS no DPP ba Ministeriu Publiku atu prosesa tuir dalan legal.
Nunee wainhira estrutura universidade la kumpri ezijensia sira iha leten mak Asosiasaun Estudantes Fakuldade Siensia Sosiais, Fakuldade Medisina no Siensia Saude hamutuk ho UNTL sei organiza estudante ativu no alumni sira atu foti asaun hasoru estrutura univerisidade.
Iha fatin hanesan, Ronaldo José G. do rego hanesan senadu husi Fakuldade Medisina Siensia Saude (FMCS) dehan, kazu iha FMCS, relatoriu komisaun investigasaun ninia hatoo hotu ona iha UNTL, espera Magnifiku Reitor deklara katak asina ona akordu entre NGO no fatin sira seluk kona-ba atu halakon asediu seksual nee.
Hatan ba kestaun nee, Ministru Ensinu Superior Siensia no Cultura (MESSK), Jose Honorio da Costa Pereira dehan, relasiona ho kazu asediu seksual neebe mak akontese iha Fakuldade Siensia Medisina,(FMCS) ninia prosesu iha ona Komisaun Funsaun Publika.
“Relasiona ho kazu fakuldade medisina nian ohin dekanu informa ona mai hau, profesor nee rasik suspende ona husi ninia kargu rasik nia prosesu ba ona iha Komisaun Funsaun Publiku no hein deit desizaun husi funsaun publika,” Honorio hakotu.
Jornalista: EST 1
Editor: Xisto Mendonça
