DILI, STLTIMORLESTE.com – Ministru Ensinu Superior Siensia no Kultura (MESSK), José Honorio da Costa Pereira halao ho estrutura Universidade Nasional Timor Lorosa’e (UNTL) relasiona ho kazu asediu seksual neebe mak akontese iha Faculdade Ciência Sociais (FCS).
“Ohin dader hau bolu estrutura UNTL tomak, reitor ho dekanu sira mai tuir enkontru, tanba ita boot sira hatene katak iha semana hirak liu ba akontesimentu iha FCS neebe mak problema relasaun ho asediu seksual,” dehan MESSK ba jornalista sira iha Salaun MESSK Kolmera, Segunda (13/10/2025).
Nia dehan, kazu asediu seksual neebe mak akontese iha FCS ninia prosesu too ona iha Konselhu Disiplinar, hafoin mak ba iha Funsaun Publiku.
“Hau husu kazu pur kazu, fakuldade esplika hotu situasaun iha UNTL tomak nunee mos situasaun iha FCS, prosesu too ona iha Konselhu Disiplinar, ohin informa ona mai hau, katak prosesu husi konselhu disiplinar hotu tenke haruka ba Komisaun Funsaun Publiku,” tenik Honorio.
Nia tenik, profesor refere mos hanesan funsionariu publiku, depois husi Komisaun Funsaun Publiku sei halo desizaun hodi haree ba aktus neebe mak profesor refere komete.
“Ohin hau koalia oituan ho universidade ho estrutura, favor ida tau matan ba profesor sira, imi tenke iha enkontru regular, kazu sira hanesan nee tenke iha sensibilidade lalais para rezolve, labele husik hela too ikus mai mosu buat neebe mak ita la espera,”
Nunee husi UNTL, fakuldade suspende ona profesor refere labele hanorin wainhira ninia kazu nee iha hela prosesu nia laran.
“Atu kontinua ka la kontinua depende ba ninia kazu nee, tanba nia funsionariu publiku, tenke lori ba funsaun publiku mak deside katak nia kontinua ka sai hanesan funsionariu ka lae, nee desizaun tomak iha Komisaun Funsaun Publiku,” katak nian.
Nunee hanesan kareira dosente labele hapara, tanba nia funsionariu publiku, iha regime rua ba profesores UNTL, nia tenke submete ba funsaun publiku mak halo investigasaun, kuandu grave entaun tenke para.
Entretantu asediu seksual nee aktus neebe mak la diak, tenke para ho aktus ida nee, se nia kazu iha investigasaun neebe mak sei halo boot no grave hatoo ba iha funsaun publiku, fiar katak funsaun publiku sei halo desizaun ida tuir regras neebe mak iha
Jornalista: EST 1
Editor: Xisto Mendonça
