DILI, STLTIMORLESTE.com – Prezidente Republika (PR), Jose Ramos Horta vizita Autoridade Munisípiu Dili (AMD) hodi haree servisu funsionariu sira nian.
Iha vizita nee Prezidente Republika Jose Ramos Horta husu tenke rezolve urjente ba toilet publiku no halo manutensaun ba jardin sira iha sidade Dili.
Bainhira remata vizita, Prezidente Republika Jose Ramos Horta ba jornalista hafoin vizita Autoridade Munisípiu Dili Kaikoli, Kuarta (15/10/2025 hatete, vizita Autoridade Munisípiu Dili nee hanesan vizita primeiru iha tinan ida nee nia laran.
PR Horta dehan, nia primeiravez iha tinan sira nia laran mak mai vizita Munisípiu Dili.
“Hau agradese ba Prezidente Autoridade Munisípiu Dili konvida hau mai iha nee, hau rasik hakarak mai haree sira nia servisu staf sira iha Munisípiu Dili nian. Hau hatene katak iha difikuldade oi-oin, prioridade ba governu barak tebe-tebes maibe governu mak tenke hatene, hili prioridade neebe loloos, prioridade duni, ida toilet publiku iha sidade Dili nee tenke halo urjente, suku sira iha Dili laran,” dehan Horta.
Iha biban nee Prezidente Republika husu atu hadia problema bee moos iha kapital sidade Dili.
“Tenke rezolve problema bee moos iha Dili, hau hatene katak governu la dukur, la toba ba ida nee, maibe nee prioridade ida. Hau haree tinan sira nia laran nee, fulan ruma mai nee sidade Dili kadaves diak liu tan, maibe bele aselera prosesu biotification sidade Dili nian ho jardin. Ita halo jardin tenke halo manutensaun ba jardin, manutensaun jardin tenke ema neebe hatene jardineiru profisional, maibe mos bee, bee laiha imposivel,” dehan PR Horta.
Jornalista: Emerenciana Pinto
Editor: Xisto Mendonça
