DILI, STLTIMORLESTE.com – Primeiru Ministru (PM), Kay Rala Xanana Gusmão hatete, Governu aprova ona rezolusaun Sekretaria CPLP iha Lisboa.
Xefe Governu hatoo kestaun nee ba jornalista sira, bainhira remata halao enkontru semanal ho Prezidente Republika, Jose Ramos Horta iha Palasiu Prezidensial, Nocolau Lobato, Bairru Pite, Dili, Kinta (16/10/2025).
“Hau informa mos ba Prezidente Republika katak, horiseik ami aprova akordo ida rezulusaun ida kona-ba Sekretariadu CPLP, iha Lisboa tanba foin dadaun reuniaun iha Angola sira hotu husu dehan hatama ema iha Sekretariadu nee laos husi rai ida rua deit, maibe tenke kontempla rai hotu hotu membru CPLP tenke konkursu no tenke iha igualdade Jeneru,” dehan Primeiru Ministru, Xanana.
Primeiru Ministru hatete, foin lalais enkontru iha CPLP membru CPLP husu hatama ema iha Sekretariadu laos husi rai ida rua, maibe kontempla rai hotu hotu membru CPLP tenke konkursu nomos iha mos igualdade jeneru.
Nunee mos ho Angola ezesaun de vistu ba pasaporte Diplomatiku, nunee ema mai karik bele halo serbisu hanesan mos ho nasaun laos.
“Nunee mos ho Laos nee ita dehan karik katak se sira fo rai ruma iha neeba ba ita nia embaixada ka konsulado karik ita mos fo iha nee, ita fo iha nee karik iha neeba mos tenke fo,” dehan Primeiru Ministru, Xanana.
Nunee mos iha loron kuarta Governu aprova proposta rezolusaun dahuluk ho objetivu atu aprova, ba ratifikasaun, Estatutus Komunidade País Lian Portuges (CPLP) nian, hanesan aprova ona iha Luanda, Angola, iha loron 27 fulan-marsu tinan 2023.
Alterasaun ba estatutu nee hetan aprovasaun hosi Estadu-Membru hotu-hotu durante reuniaun ordinaria hosi Konselhu Ministrus CPLP nian, neebe halao iha Luanda, no ho objetivu atu inklui pilar dahaat hosi atividades Komunidade nian kooperasaun ekonomika no emprezarial, proposta ida husi Prezidensia angolana neebe aprova iha Simeira Xefe Estadu no Governu nian iha loron 17 fulan-julhu tinan 2021, bainhira mos iha Luanda Angola asume prezidensia rotativa organizasaun nee nian.
Pilar foun ida-nee hamutuk ho tolu neebe iha ona konsertasaun polítika no diplomatika, kooperasaun no promosaun lian no kultura portuges.
Estatutu CPLP estabelese enkuadramentu legal neebe regula relasaun entre Estadu-Membru sira, hodi define organizasaun nia objetivu, prinsípiu, estrutura organizasional no sede, no mos regras neebe orienta ninia funsionamentu institusional.
Nune mos Parlamentu nia Proposta Rezolusaun daruak ho objetivu atu ratifika Akordu entre Republika Demokratika Timor-Leste no Republika Angola kona-ba izensaun vistu ba Titular Pasaporte Diplomatiku no Servisu nian.
Akordu ida nee reflete hakarak atu aprofunda liutan relasoins neebe iha no fasilita vizita ofisial sira entre nasaun rua nee liuhosi rekoñesimentu resíproku ba pasaporte diplomatiku no ofisial ka servisu nian no mos fo izensaun vistu ba nia titular sira ba entrada no estadia too loron 90.
Jornalista: Emerenciana Pinto
Editora: Carme Ximenes
