Adere Ona ba ASEAN, Horta Husu Xanana Labele Tolera Membru Governu Laiha Kapasidade

MALAZIA, STLTIMORLESTE.com – Prezidente Republika (PR), Jose Ramos Horta husu Primeiru Ministru (PM), Kay Rala Xanana Gusmão atu labele halimar no demite membru governu sira neebe laiha kapasidade, atu halo servisu sira neebe iha ligasaun ho ASEAN.

Horta hatete, Timor Leste adere ba ASEAN nee hanesan estadu ida nia, maibe TL labele kria pozisaun ida neebe unilateral. Tanba iha planu domestiku kada nasaun halo nia planu domestika iha area setor oin-oin, maibe buat ida nee reguladu husi tratatu neebe Governu Timor Leste asina ona.

Nia dehan, Timor Leste sei partisipa iha reuniaun lubuk ida, tanba nee presiza hatudu disiplina, respeitu, se membru governu no embaixador sira mak la mosu iha reuniaun ruma mak sei presiza tau atensaun.

“Iha reuniaun membru ASEAN, membru governu sira tenke follow Up idak-idak nia servisu, no halo relatoriu ba mai, se hau rona Timor seidauk resposta hau koalia kedas ba Primeiru, se buat nee la rezolve, hau publikamente ezije, hau hakarak ministru nee aprezenta karta demisaun, ita labele halimar, ita labele halo foer ita nia estadu nia naran,” hatete PR, Horta liu husi konferensia imprensa neebe halao iha W Hotel, Kuala Lumpur, Malazia Tersa (28/10/2025).

Nia hatutan, Primeiru Ministru presiza tau atensaun ba membru governu idak-idak, tanba Timor Leste nia adezaun nee tama ho responsabilidade ho rigoruzu tebe-tebes, tanba liu husi dezafius oin-oin.

“Ita tama ASEAN tenke tama ho responsabilidade ho rigor tebe-tebes, maun bot Xanana tenke rigorozu kontrola didiak membru governu, se mak la kompetente ezekuta ninia servisu, tama ASEAN nee laos festa boot ida, servisu bot tebe-tebes no ita lori dignidade povu no rai ida nee nian,” dehan nia.

Premiadu Nobel ba Pas nee mos rekomenda Timor Leste dame iha ASEAN, tenke kaer metin vertude ida nee, nunee povu Timor Leste labele monu fila fali ba iha konflitu tanba sira mak sei sofre liu.

Jornalista: Alberto Menezes
Editora: Carme Ximenes