DILI, STLTIMORLESTE.com – Primeiru Ministru (PM), Kay Rala Xanana Gusmão deklara, liu husi Orsamentu Jeral Estadu ba tinan 2026 nian, Governu kompremetidu atu diversfika ekonomia iha rai laran hodi kria kampu servisu ba Timoroan sira.
“Governu kontinua komprometidu ho diversifika ekonomika no ho kriasaun de empregu, hamutuk ho reforsu kapital sosial no investimentu iha infraestruturas,” hatete PM, Xanana iha ambitu debate proposta lei Orsamentu Jeral Estadu (OJE) 2026, iha faze jeneralidade neebe halao iha plenaria Parlamentu Nasional (PN), Kuarta (05/11/2025).
Xefe Governu hatutan, atu konkretiza vizaun nee mak oras nee Governu hahu halo estudu ba instrumentu sira neebe sei kontribui atu realiza mehi nee.
“Atu konkretiza vizaun nee, ami estuda hela instrumentu finanseiru neebe bele kontribui atu kria kondisaun hanesan finansiamentu ba longu prazu ba investidores nasionais,” adianta Xanana.
Nia dehan, iha fulan liu ba, governu aprova ona atu kria Banku Nasional Dezenvolvimentu Timor Leste (BNDTL), neebe sei apoia investimentu produtivu no fomenta kressimentu ekonomiku husi nia setor privadu,” dehan nia.
Banku Nasional Dezenvolvimentu nee, neebe hetan inspirasaun husi melhores pratikas internasionais, hakarak finansia projetus ho impaktu ekonomiku no sosial neebe aas tebes, liu-liu iha areas prioritarias hanesan agrikultura, turismu, industria transformadora, infraestruturas ho servisus sosiais.
“Bainhira promove asessu ba kreditiu, ita laos deit dinamiza setores produtivus, maibe mos reforsa koesaun territorial ho inkluzaun sosial. Banku Nasional Dezenvolvimentu nee sei sai hanesan pilar fundamental ida ba futuro ekonomiku nasaun nee nian,” hatete PM, Xanana.
Jornalista: Alberto Menezes
Editora: Carme Ximenes
