BAUKAU, STLTIMORLESTE.com – Projetu reabilitasaun estrada diresaun husi Postu Administrativu Laga ba Postu Baguia iha Munisipiu Baukau lao neineik.
Projetu reabilitasaun estrada Laga-Baguia lansa fatuk dahuluk iha tinan 2022 ho durasaun tempu servisu fulan 24 neebe responsabiliza husi kompanhia Norinco International Cooperation no hetan suprevizaun husi Kompanhia PT. Inacon Luhur Pertiwi, JV Kai Watu Kmanek Consultant, Unip. Lda, no PT Sinotech Engineering Indonezia, ho valor orsamentu US$ 21,695,194.98, neebe hadiak ho luan estrada metru 7, kompostu alkatraun metru 4, alargamentu metru 1 no ombru metru 2 ba distansia estrada kilometru 38.3 husi area Postu Laga too Postu Baguia.
Tuir kontratu neebe iha, projetu refere ho durasaun servisu fulan 24 no tuir tarjetu lo-loos projetu refere finaliza ona, maibe too ohin loron seidauk finaliza, tanba deskonfia parte kompanhia implementador menus ekipamentus pezadu ba servisu refere.
“Projetu estrada Baguia nee ekipamentus pezadu menus tebes, tanba nee mak difikulta ba prosesu projetu reabilitasaun estrada nee rasik,” hateten Administrador Postu Baguia, Mario Xavier da Silva ba jornalista STL liu husi telefone, Sabadu (08/11/2022).
Nia kompara, projetu reabilitasaun estrada Laga-Baguia ho Uaiaka Mulia ba Nahareka lansamentu fatuk dahuluk diferente deit iha fulan, maibe projetu reabilita estrada Laga-Baguia lao neineik liu too ohin loron seidauk finaliza, enkuantu projetu reabilita estrada Uaiaka Mulia ba Nahareka iha progresu diak tebes, tanba progresu nahe alkatraun too ona iha area Postu Administrativu Matebian.
Tanba nee husu Ministeriu Obras Publikas (MOP) tau atensaun ba kompanhia implementador projetu estrada Laga-Baguia, nunee bele finaliza iha tempu besik.
“Kompanhia agora nafatin servisu maibe ita husu ba Ministeriu para tau atensaun nafatin ba ita nia projetu reabilitasaun estrada nee rasik,” Mario sujere.
Mezmu nunee projetu refere nia progresu eskalasaun ba segundu etapa nian falta kilometru 2 too ona iha Postu Baguai Vila, servisu hanesan beiscos too ona iha area Suku Sagadate enkuantu progresu nahe alkatraun foin too iha area Teloidai, Postu Administrativu Laga.
Jornalista: Tomas Reis
Editor: Xisto Mendonça
