DILI, STLTIMORLESTE.com – Ministru Defeza (MD) Kontra Almirante Donaciano do Rosario da Costa Gomes “Pedro Klamar Fuik” husu ba joven post independensia atu prezerva valor istoria masakre Santa Krus 12 Novembru 1991, atu nunee bele hatene istória independensia Timor Leste (TL) nian.
“Ba Timor oan hotu-hotu liliu ba joventude sira neebe mak boot pos independensia atu bele iha konsensia ida neebe mak metin kona ba ita nia istória ba libertasaun nasionál. Valór hotu-hotu neebe mak joventude halo iha pasadu fo sira nia vida rasik para atu liberta rai nee,”hatete Ministru Defeza (MD) Kontra Almirante Donaciano do Rosario da Costa Gomes ” Pedro Klamar Fuik”ba jornalista sira iha Kuartel Jeneral F-FDTL Fatuhada, Kuarta (12/11/2025).
Nia dehan, uma vés que rai nee libertadu ona saida mak joventude sira agora pos independensia atu halo presiza.
“Primeiru tenke hanoin katak ita-nia independensia nee ita konkista ho sakrifisiu barak, segundu tenke hanoin hanesan juventude saida mak bele kontribui ba independensia nee terseiru hanoin beibeik hanesan joventude lori independensia TL nee ba futuru lori Timor ba mundu”, nia informa.
Nia husu ba joven sira atu halo tuir buat tolu nee para bele hatutan joven sira neebe uluk fo vida mate.
“Ida nee mak hau nia mesajen tolu ba joventude sira atu komemora 12 de Novembru hanoin hikas fila fali ita-nia maun alin sira neebe mak mate iha ita nia libertasaun, mate iha trajedia Santa Kruz 12 Novembru”, nia fo hanoin.
Jornalista: Jeniche da Costa
Editora: Domingas Gomes
