DILI, STLTIMORLESTE.com – Xefe Estadu Maior Jenerál FALINTIL-Forsa Defeza Timor Leste (F-FDTL), Tenente Jenerál, Domingos Raul “Falur Rate Laek” klarifika adiamentu viajen forsa tarefa konjunta misaun umanitária Filipina.
Tuir nia katak, lo-loos nee ajenda neebe mak iha kontijente forsa tarefa konjunta misaun umanitária Filipina sei halo nia viajen ba Filipina iha Kuarta nee (12/11/2025), maibe la konsege, tanba Governu Timor Leste presiza komunika ho Governu Indonézia hodi husu autorizasaun tráfiku Aero molok forsa tarrefa konjunta halo nia viajen ba Filipina.
“Horiseik kedan ita nian Ministru Negósiu Estranjeiru halo kontaktu permante hela ho Jakarta, soke espasu aero mak sira seidauk autoriza, nee mak ohin ita nia forsa tarefa konjunta neebe atu halo misaun umanitária iha Filipina seidauk bele ba,” dehan Xefe Estadu Maior Jenerál FALINTIL-Forsa Defeza Timor Leste (F-FDTL), Tenente Jenerál Domingos Raul “Falur Rate Laek” ba jornalista sira hafoin partisipa serimónia komemorasaun 12 Novembru masakre Santa Krús ba dala 34, Kuarta (12/11/2025).
Nia esplika, Indonézia tenke aprova Timor-Leste mak foin halo viajen iha espasu aero tráfiku iha Indonezia nian hodi ba Filipina, se Indonézia la autoriza espasu aero, entaun Timor-Leste nian aviaun labele semo iha sira nia area.
“Ida nee tenke hetan autorizasaun husi sira molok ita halo viajen aero. Tenke husu aurtorizasaun purke nee tráfiku aero neebe sira tenke autoriza,” nia informa.
Xefe Estadu Maior Jenerál FALINTIL-Forsa Defeza Timor Leste (F-FDTL) Tenente-Jenerál, Domingos Raul “Falur Rate Laek” deklara, ida nee presiza rezolve tanba nee liga ba iha kestaun autorizasaun tráfiku aero.
“Atu rezolve ida nee presiza loron rua nian iha loron nia laran molok ekipa halo viajen. Neebe sira kalau ajenda ona ba iha dia 14 no 15 Novembru ita nia forsa tarrefa sei aranka husi Dili ba Filipina,” nia tenik.
Nia koalia, ekipa forsa tarrefa konjunta misaun umanitária Filipina sei aranka ho aviaun aero Dili.
Jornalista: Jeniche da Costa
Editora: Domingas Gomes
