DILI, STLTIMORLESTE.com – Dom Virgilio Kardeal do Carmo da Silva, SDB hatete, unidade nasional nee ema hotu nia esperansa, tanba nee lider sira presiza lao hamutuk hodi lori nasaun nee ba oin.
Dom Virgilio Kardeal do Carmo da Silva, SDB hatoo kestaun nee ba jornalista sira, iha Palasiu Prezidensial, Nicolau Lobato, Bairo Pite, Dili, Tersa (16/12/2025).
Dom Virgilio dehan, igreja ninia hanoin ba unidade nasional mak Igreja sempre haklaken kona-ba pas no domin, ”Unidade nasional nee hotu-hotu nia esperansa, hakarak ita nia líder sira lao hamutuk, no povu. Igreja ninia hanoin saida mak Igreja hanoin, Igreja kontinua, tinan bailoron ami kontinua haklaken kona-ba domin, pas, haree malu diak iha tempu natal, agora koalia kona-ba natal nee tempu ida pas ninian, tempu rekonsialiasaun, tempu domin ninian,” dehan Dom Virgilio.
Uma Kreda tuir Dom Virgilio ninia knaar liu husi Amululik sira, Igreja kontinua haklaken unidade , depende ba ema ida-idak, tanba nee ohin koalia kona-ba hateke ba moris nee.
Tanba papel Igreza nian nafatin reza ba ema hotu, nunee bele moris iha unidade nia laran.
“Parte seluk Igreja nia papel mos reza ba ninia sarani sira, reza ba família sira, reza ba joven sira, reza ba polítiku sira, reza ba nai ulun sira hotu ho Maromak ninia tulun, hein katak bele, ita hotu iha esperansa katak loron ida buat neebe ita hein sei bele akontese,” dehan Dom Virgilio.
Bibi Atan Kreda Katolik Timor-Leste nee mos nafatin reza ba sarani sira hotu, nunee ba lider nasional sira nunee nafati moris iha unidade nasional nunee bele moris ho dame.
Foin lalais iha loron 19 Novembru 2025, Eis Primeiru Ministru, atual Sekretariu Jeral Partidu Fretilin, Marí Bim Amude Alkatiri hasoru malu ho Dom Virgilio Cardeal do Carmo da Silva, SDB iha Konferensia Episkopal Lecidere koalia kona-ba unidade nasional.
Jornalista: Emerenciana Pinto
Editora:Carme Ximenes
